- రిలయన్స్‌ జియో ప్రకటన
ముంబయి : దేశంలో 5జి సేవలను దీపావళి కానుకగా అందుబాటులోకి తెస్తామని ఇటీవల ప్రకటించిన రిలయన్స్‌ సంస్థ ట్రయల్‌ బేసిస్‌పై దసరా నుంచే ఈ సేవల్ని ప్రజలకు అందుబాటులోకి తెస్తున్నట్టు తాజాగా ప్రకటించింది. ఢిల్లీ, ముంబయి, కోల్‌కతా, వారణాసి నగరాల్లో ట్రయల్‌ బేసిస్‌ ఆధారంగా అక్టోబర్‌ 5నుంచి ఈ సేవలను ప్రారంభించనున్నట్టు తెలిపింది. జియో ట్రూ 5జి వెల్‌కం ఆఫర్‌ కింద ఈ పైన పేర్కొన్న నగరాలలో జియో యూజర్లకు బీటా ట్రయల్‌ సేవలు అందుబాటులోకి తీసుకురానున్నట్టు తెలిపింది. ఈ ఆఫర్‌ కింద వినియోగదారులు 5జీ అన్‌లిమిటెడ్‌ డేటాను 1 జిబిపిఎస్‌ వేగంతో పొందొచ్చు. జియో ట్రూ 5జి ప్రపంచంలోనే అత్యంత అధునాతన 5జీ సర్వీసులుగా భావిస్తున్నారు. జియో వెల్‌కమ్‌ ఆఫర్‌ కింద ఉన్న యూజర్లు ఆటోమేటిక్‌గా జియో ట్రూ 5జీ సర్వీస్‌కు అప్‌గ్రేడ్‌ అవుతారని, ఇందుకోసం జియో సిమ్‌గానీ, 5జీ హ్యాండ్‌సెట్‌గానీ మార్చాల్సిన అవసరం లేదని పేర్కొంది.