- విగ్రహావిష్కరణ కార్యక్రమంలో సంగీత దర్శకులు కోటి
గుంటూరు : ఎస్‌పి బాలసుబ్రహ్మణ్యం గానగంధర్వుడని ప్రముఖ సినీ సంగీత దర్శకులు కోటి (సాలూరి కోటేశ్వరరావు) అన్నారు. ఏపీలోని గుంటూరులో బాలసుబ్రహ్మణ్యం (బాలు) కాంస్య విగ్రహాన్ని ఆదివారం ఆయన ఆవిష్కరించారు. గుంటూరు కళాదర్బార్‌ అధ్యక్షులు పొత్తూరి రంగారావు ఆధ్వర్యంలో శిల్పి రాజ్‌కుమార్‌ వడయార్‌ ఈ విగ్రహాన్ని రూపొందించారు. పద్మశ్రీ ఘంటసాల, మహానటి సావిత్రి విగ్రహాల చెంతనే ఈ విగ్రహాన్ని ఏర్పాటు చేశారు. విగ్రహావిష్కరణ సందర్భంగా పొత్తూరి రంగారావు అధ్యక్షతన జరిగిన సభలో కోటి మాట్లాడుతూ బాలుతో తనకు విడదీయరాని అనుబంధం ఉందని గుర్తు చేసుకున్నారు. తన మొదటి పాట నుంచి కొన్ని వేల పాటలకు ఇద్దరం కలిసి పనిచేశామని, ఇలా చెప్పుకోవడం తనకెంతో గౌరవమని తెలిపారు. అలాంటి గొప్ప వ్యక్తి విగ్రహావిష్కరణ కార్యక్రమంలో పాల్గొనడం ఆనందంగా ఉందని అన్నారు. దేశంలోనే తొలి బాలు విగ్రహాన్ని గుంటూరులో ఏర్పాటు చేసిన ఘనత కళాదర్బార్‌కు దక్కుతుందని తెలిపారు.
