- పెరిగిన నేరాలు...ఎన్‌పీఆర్‌ అప్‌డేట్‌ చేయాల్సిందే
- జన గణనలో జియో స్పేషియల్‌ టెక్నాలజీ
- మానవ హక్కుల ఉల్లంఘన : కేంద్ర హౌం మంత్రిత్వ శాఖ రిపోర్టు
న్యూఢిల్లీ : దేశవ్యాప్తంగా 576 భాషలు, మాండలికాల ఫీల్డ్‌ వీడియోగ్రఫీతో మదర్‌ లాంగ్వేజ్‌ సర్వే ఆఫ్‌ ఇండియా (ఎంటీఎస్‌ఐ) ప్రాజెక్టును హౌం మంత్రిత్వ శాఖ (ఎంహెచ్‌ఎ) విజయవంతంగా పూర్తి చేసింది. ఈ మేరకు హౌం మంత్రిత్వ శాఖ వార్షిక నివేదిక- 2021-22ను విడుదల చేసింది. ఈ నివేదిక ప్రకారం ప్రతి స్వదేశీ మాతృభాష అసలు రుచిని సంరక్షించడానికి, విశ్లేషించడానికి నేషనల్‌ ఇన్ఫర్మేటిక్స్‌ సెంటర్‌ (ఎన్‌ఐసీ)లో వెబ్‌ ఆర్కైవ్‌ను ఏర్పాటు చేయాలని యోచిస్తోంది. దీని కోసం భాషావేత్తలు, భాషా డేటాను ఏర్పాటు చేయడంలో సరైన ఎడిటింగ్‌ ప్రక్రియలో ఉందని తెలిపింది. ఆరో పంచవర్ష ప్రణాళిక నుంచి లింగ్విస్టిక్‌ సర్వే ఆఫ్‌ ఇండియా (ఎల్‌ఎస్‌ఐ) దేశంలో క్రమం తప్పకుండా పరిశోధన కార్యకలాపాలు నిర్వహిస్తున్నట్టు హౌం మంత్రిత్వ శాఖ పేర్కొంది. ఈ ప్రాజెక్టు కింద ఇంతకు ముందు ప్రచురణలకు కొనసాగింపుగా, ఎల్‌ఎస్‌ఐ జార్ఖండ్‌పై వాల్యూమ్‌ ఖరారు చేయబడింది. ఎల్‌ఎస్‌ఐ హిమాచల్‌ ప్రదేశ్‌లో పూర్తి కావడానికి దగ్గరగా ఉంది. ఎల్‌ఎస్‌ఐ తమిళనాడు, ఉత్తరప్రదేశ్‌ల క్షేత్రస్థాయి పనులు జరుగుతున్నాయని తెలిపింది.మాతృభాషలకు సంబంధించిన వీడియోగ్రాఫ్డ్‌ స్పీచ్‌ డేటాను ఆర్కైవింగ్‌ ప్రయోజనాల కోసం ఎన్‌ఐసీ సర్వర్లో అప్లోడ్ చేయబోతున్నట్టు నివేదిక తెలిపింది.
జన గణనలో జియో స్పేషియల్‌ టెక్నాలజీ
కోవిడ్‌-19 మహమ్మారి కారణంగా నిలిపివేయబడిన రాబోయే జనాభా గణనలో అధునాతన జియోస్పేషియల్‌ టెక్నాలజీని ఉపయోగించడంతో సహా మెగా వ్యాయామం సజావుగా నిర్వహించడానికి అనేక కొత్త చర్యలు తీసుకున్నట్లు మంత్రిత్వ శాఖ తెలిపింది. జనాభా లెక్కలకు ముందు మ్యాపింగ్‌ కార్యకలాపాల్లో, దేశంలోని మొత్తం భౌగోళిక ప్రాంతం సరైన కవరేజీని ధ్రువీకరించడం కోసం రాష్ట్రాలు, కేంద్రపాలిత ప్రాంతాలు, జిల్లాలు, ఉప జిల్లాలు, గ్రామాలు, పట్టణాలు, పట్టణాల్లోని వార్డుల పరిపాలనా యూనిట్‌లను చూపించే మ్యాప్‌ల తయారీ, అప్‌ డేట్‌లు ఉంటాయని తెలిపింది. ఇంకా, వెబ్‌ ఆధారిత ఇంటరాక్టివ్‌ మ్యాప్‌లతో జనాభా లెక్కల ఫలితాలను వ్యాప్తి చేయడానికి ప్రయత్నాలు జరుగుతున్నాయనీ, ఈ దిశగా సన్నాహక పనులు ఇప్పటికే ప్రారంభమయ్యాయని పేర్కొంది. జన గణన మ్యాపింగ్‌ కార్యకలాపాలను వేగంగా, సమర్థవంతంగా పూర్తి చేయడానికి వెర్షన్లు, సాఫ్ట్‌వేర్‌ రీ-మాడ్యూల్స్‌ కొనుగోలు, తాజా సాఫ్ట్‌వేర్‌లను ఉపయోగించడంపై శిక్షణ పొందిన అన్ని మ్యాపింగ్‌ మ్యాన్పవర్లను కొనుగోలు చేయడం ఈ చొరవలలో కొన్ని ఉన్నాయని నివేదిక తెలిపింది. జనాభా లెక్కల కోసం ఆరు లక్షలకు పైగా మ్యాప్లు (జిల్లా, ఉప జిల్లా, గ్రామ స్థాయి) తయారు చేయబడ్డాయని, ఇన్‌-హౌస్‌ పోర్టల్లో అప్లోడ్ చేయబడ్డాయని తెలిపారు. దేశంలో మొట్టమొదటిసారిగా హౌస్‌ లిస్టింగ్‌ బ్లాక్‌ (హెచ్‌ఎల్బీ) మొబైల్‌ మ్యాపింగ్‌ యాప్‌ను దేశంలో రాబోయే జనాభా లెక్కల అన్ని ఎన్యుమరేషన్‌ బ్లాక్‌ల జియో-రిఫరెన్సింగ్‌ కోసం ప్రవేశపెట్టబడిందని పేర్కొంది. దీనిపై జాతీయ, మాస్టర్‌ ట్రైనర్లకు అవసరమైన శిక్షణ ఇవ్వడం జరిగిందని తెలిపింది. మ్యాపింగ్‌ యాప్‌ వినియోగంపై సూచనల మాన్యువల్‌ను ఇంగ్లీష్‌, హిందీ, ప్రాంతీయ భాషల్లో తయారు చేసినట్లు నివేదిక తెలిపింది.
కరోనా రెండో వేవ్‌లో ఆక్సిజన్‌ కొరత
కరోనా రెండో వేవ్‌లో ఆక్సిజన్‌, రెమ్‌డెసివిర్‌ కొరత ఎక్కువగా ఉన్నదని కేంద్ర హౌం మంత్రిత్వ శాఖ ఒప్పుకున్నది. ''ఏప్రిల్‌ 2021 నుంచి ప్రారంభమైన కోవిడ్‌ -19 కేసుల పెరుగుదల ఫలితంగా మితమైన, క్లిష్టమైన కోవిడ్‌ -19 రోగుల చికిత్స కోసం మెడికల్‌ ఆక్సిజన్‌, రెమ్‌డెసివిర్‌, ఇతర ప్రాణాలను రక్షించే మందుల డిమాండ్‌ పెరిగింది'' అని నివేదిక పేర్కొంది. అవసరమైన వైద్య ఆక్సిజన్‌తో పాటు రెమ్‌డెసివిర్‌తో సహా ప్రాణాలను రక్షించే మందులను తగినంతగా, నిరంతరాయంగా సరఫరా చేసేందుకు అనేక చర్యలు తీసుకున్నట్లు హౌం మంత్రిత్వ శాఖ పేర్కొంది. అలాగే ఆక్సిజన్‌ వాడకాన్ని తగ్గించేందుకు అన్ని రాష్ట్రాలకు ఆదేశాలు ఇచ్చామని పేర్కొంది.
438 ఎన్‌ఐఏ కేసులు
జాతీయ దర్యాప్తు ఏజెన్సీ (ఎన్‌ఐఏ) 2022 మార్చి 31 నాటికి 438 కేసులను నమోదు చేసిందని నివేదిక పేర్కొంది. వాటిలో 349 కేసులకు చార్జీషీట్‌ దాఖలు చేసినట్లు, 89 కేసుల్లో విచారణ ముగిసినట్టు , 83 కేసుల్లో శిక్షలు పడినట్లు తెలిపింది. 42 సంస్థలను ఉగ్రవాద సంస్థలుగా, 31 మంది తీవ్రవాదులుగా ప్రకటించినట్టు నివేదిక స్పష్టం చేసింది.
నక్సల్స్‌ ప్రభావిత ప్రాంతాల్లో హింస తగ్గుదల
2013తో పోల్చితే 2021లో హింసాత్మక సంఘటనలు 1,136 నుండి 509 వరకు తగ్గాయనీ, 63 శాతం తగ్గినట్లు హౌం మంత్రిత్వ శాఖ పేర్కొంది. మరణాలు 397 నుంచి 147 వరకు తగ్గాయనీ, 55 శాతం తగ్గినట్లు తెలిపింది. 2020తో పోలిస్తే, 2021 సంవత్సరంలో (665 నుండి 509 వరకు) 24 శాతం తగ్గుదల నమోదు అయిందని, ఫలితంగా (183 నుంచి 147) 20 శాతం మరణాలు తగ్గాయని తెలిపింది. నక్సల్స్‌ ప్రభావిత జిల్లాలు 2018 ఏప్రిల్‌ నాటికి 90 ఉంటే, 2021 జూలై నాటికి 70కి తగ్గాయని పేర్కొంది. 2006 అటవీ హక్కుల చట్టం ప్రకారం 10 నక్సల్స్‌ ప్రభావిత రాష్ట్రాలలో అటవీ భూమిపై వారి హక్కులను రక్షించండానికి ఆంధ్రప్రదేశ్‌, బీహార్‌, ఛత్తీస్‌గఢ్‌, జార్ఖండ్‌, మధ్యప్రదేశ్‌, మహారాష్ట్ర, ఒడిశా, తెలంగాణ, ఉత్తరప్రదేశ్‌, మశ్చిమ బెంగాల్‌ ఇప్పటి వరకు 32,85,858 క్లెయిమ్‌లు స్వీకరించామనీ, అందులో 16,98,558 టైటిల్‌ డీడ్‌లు పంపిణీ చేసినట్టు తెలిపారు.
నేరాలు పైపైకి..
దేశంలో ఏడాదికి ఏడాది నేరాలు పెరుగుతున్నాయి. 2020లో దేశంలో 66,01,285 నేర ఘటనలు జరిగాయి. 2019 (385.5 నేర రేటు) కంటే 2020లో 487.8 శాతానికి పెరిగింది. హత్యలు 29,193, కిడ్నాప్‌, అపహరణ 84,805, మొత్తం హింసాత్మక నేరాలు 4,00,006 ఘటనలు జరిగాయి. చిన్నారులపై నేరాలు 1,28,531, ఎస్సీలపై 50,291, ఎస్టీలపై 8,272, వద్ధులపై 24,794 నేరాలు జరిగాయి. ఆర్థిక నేరాలు 1,45,754, సైబర్‌ క్రైం 50,035 ఘటనలు చోటు చేసుకున్నాయి. 2021 డిసెంబర్‌ 31 నాటికి మహిళకు సంబంధించి క్రైం అండ్‌ క్రిమినల్‌ ట్రాకింగ్‌ నెట్‌వర్క్‌ సిస్టమ్‌ (సీసీటీఎన్‌ఎస్‌)లో 7.32 కోట్ల ఎఫ్‌ఐఆర్‌లు నమోదు అయ్యాయి. అన్ని రాష్ట్రాల్లో గంజాయి 4,62,845 కేజీలు, హెరాయిన్‌ 5,295 కేజీలు, నల్లమందు 2,368 కేజీలు, మార్ఫిన్‌ 95 కేజీలు, హషీష్‌ 1,887 కేజీలు, కొకైన్‌ 317 కేజీలు పట్టుకున్నారు.
తీవ్రమైన మానవ హక్కుల ఉల్లంఘన
2021 ఏప్రిల్‌ 1 నుంచి 2021 డిసెంబర్‌ 31 వరకు 84,361 కేసులు ఎన్‌హెచ్‌ఆర్‌సీలో నమోదు అయ్యాయి. అందులో 279 కేసుల్లో రూ.8,85,10,840 పరిహారం చెల్లించాలని ఆదేశించింది. ఎన్‌హెచ్‌ఆర్‌సి 1,870 కేసులను డీల్‌ చేసింది. ఇందులో 1,203 జ్యుడిషియల్‌ కస్టడీ మరణాల కేసులు ఉన్నాయి. 170 పోలీస్‌ కస్టడీ మరణాలు కేసులు, 287 నిజనిర్ధారణ కేసులు ఉన్నాయి. 201 పోలీస్‌ ఎన్‌కౌంటర్‌ కేసులను ఎన్‌హెచ్‌ఆర్‌సి డీల్‌ చేసిందని, 22 కేసుల్లో తీవ్రమైన మానవ హక్కుల ఉల్లంఘన జరిగినట్లు పేర్కొంది. ప్రకృతి వైపరీత్యాలు వల్ల 2,206 మంది మరణించారు. 54,946 జంతువులు ప్రభావానికి గురయ్యాయి. 1,46,935 ఇల్లు ధ్వంసం అయ్యాయి. 23.682 లక్షల హెక్టర్ల పంట నష్టం జరిగింది.
కేంద్ర పోలీస్‌ బలగాల్లో 74,951 పోస్టులు ఖాళీలు
కేంద్ర పోలీస్‌ బలగాలు సీఆర్‌పీఎఫ్‌, బీఎస్‌ఎఫ్‌, ఎఆర్‌, ఐటీబీపీ, ఎస్‌ఎస్‌బీ, సీఐఎస్‌ఎఫ్‌, ఎన్‌ఎస్‌జీలకు 2021-22 బడ్జెట్‌లో రూ.3,068 కోట్లు కేటాయించగా, అందులో రూ.2,496.70 కోట్లు ఖర్చు చేశారు. అలాగే సీఆర్‌పీఎఫ్‌, బీఎస్‌ఎఫ్‌, ఎఆర్‌, ఐటీబీపీ, ఎస్‌ఎస్‌బీ, సిఐఎస్‌ఎఫ్‌ల్లో 74,951 పోస్టులు ఖాళీలు ఉన్నాయి. 2022 మార్చి 31 వరకు దేశంలో 1,71,653 స్వాతంత్ర సమరయోధులు పెన్షన్‌కు అర్హులని, అందులో ఏపీ, తెలంగాణల నుంచి 15,285 మంది ఉన్నారు.
ఎన్‌పీఆర్‌ అప్‌డేట్‌ చేయాల్సిందే
జాతీయ జనాభా రిజిస్టర్‌ (ఎన్‌పీఆర్‌)ను అప్‌డేట్‌ చేయాల్సిన అవసరం ఉందని నివేదిక పేర్కొంది. అసోం మినహా దేశవ్యాప్తంగా ఎన్‌పీఆర్‌ డేటాబేస్‌ను నవీకరించాల్సిన అవసరాన్ని నొక్కి చెప్పింది. దీంతో దేశంలో జననాలు, మరణాలు, వలసల కారణంగా జనాభా డేటాలో మార్పులు గుర్తించబడతాయని, ప్రజలు, వారి కుటుంబాల సమాచారాన్ని నమోదు చేయడం కూడా సాధ్యమవుతుందని నివేదిక పేర్కొంది. కోవిడ్‌ -19 మహమ్మారి కారణంగా ఎన్‌పీఆర్‌ను నవీకరించే పని, ఇతర క్షేత్ర కార్యకలాపాలు ఆగిపోయాయని మంత్రిత్వ శాఖ నివేదిక పేర్కొంది. ఎన్‌పీఆర్‌ డేటాను ప్రజలు స్వయంగా అప్‌డేట్‌ చేసుకోవచ్చని హౌం మంత్రిత్వ శాఖ తెలిపింది. నవీకరణ సమయంలో ఎలాంటి పత్రాలు, బయోమెట్రిక్‌లు సేకరించబడవని పేర్కొంది. పౌరసత్వ చట్టం-1955 ప్రకారం రూపొందించిన పౌరసత్వ నియమాలు, 2003లోని వివిధ నిబంధనల ప్రకారం ఎన్‌పీఆర్‌ తయారు చేయబడిందని నివేదిక పేర్కొంది. పేరు, లింగం, పుట్టిన తేదీ, పుట్టిన ఊరు, నివాస స్థలం, తండ్రి, తల్లి పేర్లను అప్‌ డేట్‌ చేసి ఆధార్‌ నంబర్‌, మొబైల్‌ నంబర్‌, రేషన్‌ కార్డు నంబర్లను సేకరించారు. జననాలు, మరణాలు, వలసల వల్ల వచ్చే మార్పులను చేర్చడానికి రిజిస్టర్‌ను నవీకరించాల్సిన అవసరం ఉందని మంత్రిత్వ శాఖ తెలిపింది. 2021 ఏప్రిల్‌ 1 నుండి 2021 డిసెంబర్‌ 31వరకు పౌరసత్వ చట్టం-1955 ప్రకారం దేశవ్యాప్తంగా మొత్తం 1,414 మందికి పౌరసత్వ ధ్రువీకరణ పత్రాలు అందించినట్లు పేర్కొంది. 29 జిల్లాల జిల్లా మేజిస్ట్రేట్‌లు, తొమ్మిది రాష్ట్రాల హౌం సెక్రెటరీలకు పాకిస్థాన్‌, ఆఫ్ఘనిస్తాన్‌, బంగ్లాదేశ్‌ నుంచి వచ్చిన హిందూ, సిక్కు, జైన, బౌద్ధ, క్రిస్టియన్‌, పార్సీ వర్గాలకు చెందిన వ్యక్తులకు విచారణ అనంతరం భారత పౌరసత్వం మంజూరు చేసేందుకు ప్రభుత్వం అధికారం ఇచ్చిందని మంత్రిత్వ శాఖ తెలిపింది.
