- రాష్ట్రాలపై కేంద్రం పెత్తనం
- రాష్ట్ర ప్రభుత్వాల వ్యవహారాల్లో మితిమీరిన జోక్యం
- బీజేపీకి అనుకూలంగా పనులు చక్కబెడుతున్న తీరు
- రాజ్యాంగ పదవిని దుర్వినియోగం చేస్తున్న మోడీ సర్కారు
- సమాఖ్య విధానానికి తూట్లు : రాజకీయ విశ్లేషకులు
కేంద్రంలోని మోడీ సర్కారు రాజ్యాంగ పదవులను దుర్వినియోగ చేస్తుంది. రాజకీయ ప్రయోజనాలే లక్ష్యంగా గవర్నర్ వ్వవస్థతో రాష్ట్రాలపై అధికారం చెలాయిస్తున్నది. ప్రజాస్వామ్యబద్ధంగా ఎన్నికైన ఆయా రాష్ట్ర ప్రభుత్వాల వ్యవహారాల్లో కలుగజేసుకుంటూ హద్దులు దాటి వ్యవహరిస్తున్నది. రాష్ట్రమేదైనా బీజేపీ రాజకీయ ప్రయోజనాలకు అనుగుణంగా గవర్నర్లు వ్యవహరిస్తున్నారనే అపవాదు వినిపిస్తున్నది. కేంద్రం 'గవర్నర్‌గిరి'తో ఇప్పటికే పలు రాష్ట్రాలు విసిగెత్తిపోయాయి. ఈ జాబితాలో తెలంగాణ, కేరళ, తమిళనాడు, ఢిల్లీ, పశ్చిమ బెంగాల్‌, పంజాబ్‌లతో సహా అనేక రాష్ట్రాలున్నాయి.
న్యూఢిల్లీ : కేంద్రంలోని మోడీ సర్కారు హయాంలో గవర్నర్ వ్యవస్థ దిగజారిపోతున్నది. బీజేపీ రాజకీయ ప్రయోజనాలతో ఆ పదవికి ఉన్న గౌరవం తగ్గిపోతున్నదని రాజకీయవేత్తలు ఆరోపించారు. ఇందుకు దేశంలోని అనేక రాష్ట్రాలలో గవర్నర్లు, అక్కడి రాష్ట్ర ప్రభత్వాలతో వ్యవహరిస్తున్న తీరును వారు ఉదహరించారు. రాజ్‌భవన్‌ అనేది సమాంతర ప్రభుత్వానికి కేంద్రంగా మారిందని తెలిపారు. అయితే, గవర్నర్ వ్యవస్థ దుర్వినియోగం ఎప్పటి నుంచో ఉన్న మోడీ పాలనలో అది ఉచ్ఛస్థాయికి చేరిందని చెప్పారు. కేరళలో తొలిసారిగా వామపక్ష ప్రభుత్వం అధికారం చేపట్టిన తర్వాత గవర్నర్ సిఫారసులపై ప్రభుత్వం రద్దయిన విషయాన్ని రాజకీయవేత్తలు గుర్తు చేశారు. అప్పటి నుంచీ దేశంలో ఆర్టికల్‌ 365 దుర్వినియోగం కొనసా గుతున్నదని చెప్పారు.
మోడీ పాలనలో తీవ్రం
2014లో కేంద్రంలో మోడీ పాలన మొదలైనప్పటి నుంచి గవర్నర్ మర్యాద నిఘంటువు పూర్తిగా తారు మారైందని విశ్లేషకులు తెలిపారు. కేంద్ర దర్యాప్తు సంస్థలైన ఎన్‌ఫోర్స్‌ మెంట్‌ డైరెక్టరేట్‌ (ఈడీ), సెంట్రల్‌ బ్యూరో ఆఫ్‌ ఇన్వెస్టిగేషన్‌ (సీబీఐ), ఆదాయపు పన్ను శాఖ (ఐటీ), జాతీయ దర్యాప్తు సంస్థ (ఎన్‌ఐఏ) లను రాజకీయ ప్రయోజనాల కోసం విపక్ష పాలిత రాష్ట్రాల్లోని అక్కడి పాలకపక్ష నేతలపై దాడులకు వినియోగిస్తున్న తీరులో గవర్నర్లు కీలకంగా మారా రు. దీంతో ఒక్కసారిగా సంబంధిత రాష్ట్రాల్లోని గవర్నర్లు దూకుడు పెంచారు. వారు తమ రాష్ట్ర ప్రభత్వ నిర్ణయాలపై బహిరంగంగా దాడి చేయటానికీ, వాటిని ప్రజా వ్యతిరేక మైనవిగా చిత్రీకరించటానికి ప్రతి అవకాశాన్నీ ఉపయోగించటాన్ని ప్రార ంభించారని విశ్లేషకులు తెలిపారు. మోడీకి ముందు దేశంలో పరిస్థితులు ఇంతలా దిగజారలేదని చెప్పారు.
ఢిల్లీలో ఎల్జీ పెత్తనం
బీజేపీయేతర రాష్ట్రాలలో అక్కడి గవర్నర్లు పరిపాలనా వ్యవహారాల్లో నిర్మొహమాటంగా జోక్యం చేసు కోవటం తీవ్రమైంది. ఢిల్లీలో అక్కడి లెఫ్టినెంట్‌ గవర్నర్ (ఎల్జీ) సక్సేనా రోజువారీ జోక్యం, అడ్డంకులు రాష్ట్ర పరిపాలనకు అడ్డంగిగా మారింది. అక్కడి అధికార ఆమాద్మీ పార్టీ (ఆప్‌) ఈ సమస్యను సుప్రీంకోర్టుకూ తీసుకెళ్లింది. ఢిల్లీ ఉప ముఖ్యమంత్రి మనీశ్‌ సిసోడియా ఎల్జీ జోక్యం చేసుకున్న వివిధ కేసులను సుప్రీం కోర్టుకు సమర్పించిన తన అఫిడవిట్‌ లో వివరించారు. ఇది బీజేపీయేతర రాష్ట్రాల్లో గవర్నర్, ఎల్జీల జోక్యం స్థాయికి ఒక ఉదాహరణ అని విశ్లేషకులు తెలిపారు.
పశ్చిమబెంగాల్‌లో మమత వర్సెస్‌ ధన్‌ఖర్‌
రాజ్‌భవన్‌ బాధిత రాష్ట్రాల్లో మరొకటి పశ్చిమ బెంగాల్‌. ఇక్కడి తృణమూల్‌ కాంగ్రెస్‌ (టీఎంసీ) ప్రభుత్వానికి, మాజీ గవర్నర్ జగ్‌దీప్‌ ధన్‌ఖర్‌కు మధ్య నిత్యం ఘర్షణ వాతావరణమేనని విశ్లేషకులు గుర్తు చేశారు. రాష్ట్ర ప్రభుత్వంపై రాజ్‌భవన్‌ పెత్తనం చెలాయించే విధానానికి దారి చూపిన వ్యక్తిగా ఆయన నిలిచారన్నారు. ''నేను ఆయన సేవకురాలిని కాను. రాష్ట్ర ప్రభుత్వ అధికారులను ఆయన బెదిరిస్తున్నారు. విధానపరమైన నిర్ణయాల్లో జోక్యం చేసుకోకూడదు. రాష్ట్ర ప్రభుత్వం నుంచి 'పెగాసస్‌' జరుగుతున్నది'' అని ఆయన గవర్నర్‌గా ఉన్న సమయంలో రాష్ట్ర ముఖ్యమంత్రి మమత బెనర్జీ చేసిన వ్యాఖ్యలు. ఆ సమయంలో ధన్‌ఖర్‌ కొన్ని చర్యలు హైకోర్టు, సుప్రీంకోర్టు ల వరకూ లాగబడ్డాయి.
కేరళ గవర్నర్ వివాదాస్పద తీరు
కేరళ గవర్నర్ ఆరిఫ్‌ మహ్మద్‌ ఖాన్‌ ఇందుకు ఏ మాత్రమూ తీసిపోని విధంగా వ్యవహరిస్తున్నారని రాజకీయ విశ్లేషకులు తెలిపారు. తన పదవి కాలంలో మొదటి రెండేండ్లు రాష్ట్రంలోని వామపక్ష సర్కారుతో సఖ్యతతో మెలిగిన గవర్నర్ ఆ తర్వాత ప్రభుత్వ వ్యవహారాల్లో జోక్యం చేసుకోవటాన్ని ప్రారంభించారన్నారు. బీజేపీ నాయకులతో సత్సంబంధాలు, చర్చలు వంటివి చోటు చేసుకున్నాయని తెలిపారు. బీజేపీ కార్యకర్తలను రాజ్‌భవన్‌లో సీనియర్‌ సిబ్బందిగా నియమించుకున్న తీరును విశ్లేషకులు వివరించారు. ఇటు ఢిల్లీకి ఆయన ప్రయాణాలు తరచుగా, ఎక్కువ కాలం పాటు సాగాయని అన్నారు. ప్రస్తుతం కేరళలోని లెఫ్ట్‌ ఫ్రంట్‌ ప్రభుత్వాన్ని ఇబ్బంది పెట్టడానికి ప్రతి అవకాశాన్నీ ఉపయోగించుకుంటున్నారనీ, ఆయన తరచుగా తన గవర్నర్ అధికారాలను హద్దుమీరారని తెలిపారు. రాష్ట్ర మంత్రులను బర్తరఫ్‌ చేస్తాననీ ఆరిఫ్‌ ఖాన్‌ చేసిన వ్యాఖ్యలతో రాజ్యాంగ నిపుణుల నుంచి తీవ్ర విమర్శలు ఎదురైన విషయాన్ని ఈ సందర్భంగా వారు గుర్తు చేశారు. అంతేకాదు.. ఒక ప్రతిపక్ష నాయకుడిగా మారి ప్రభుత్వ నిర్ణయాలను తప్పుబడుతూ ఆయన బహిరంగంగానే ప్రకటనలు చేసిన సందర్భాలూ ఉన్నాయన్నారు. కేరళ దేశ 'డ్రగ్‌ క్యాపిటల్‌' గా మారుతుందని ఆరిఫ్‌ విమర్శించారు. రాష్ట్రానికి చెంఇన 15 మంది వైస్‌ ఛాన్సలర్లను తొలగిస్తూ ఉత్తర్వులు సైతం జారీ చేశారు. ఆ తర్వాత హైకోర్టు ఈ నిర్ణయంపై స్టే విధించటం గమనార్హం.
తమిళనాడులో...
తమిళనాడులోనూ గవర్నర్‌కు, అక్కడి డీఎంకే ప్రభుత్వానికి పొసగటం లేదు. ప్రభుత్వ విధానాల్లో అక్కడి గవర్నర్ జోక్యం నిత్యకృత్యంగా మారింది. గవర్నర్ ఆర్‌.ఎన్‌.రవి పదే పదే ప్రభుత్వ వ్యతిరేక విధానాలతో డీఎంకే విసిగెత్తిపోయింది. ఆయనను రీకాల్‌ చేయాలని అధికారికంగా డిమాండ్‌ చేయటానికి ఇతర పార్టీలనూ సమీకరించింది. ఇటీవల కోయంబత్తూరు పేలుళ్ల ఘటనపై చర్యలు తీసుకోవటంలో 'నాలుగు రోజుల జాప్యం'పై తమిళనాడు ప్రభత్వంపై గవర్నర్ దాడి చేసిన విషయాన్ని విశ్లేషకులు గుర్తు చేశారు. నీట్‌ బిల్లును తిరిగి అసెంబ్లీకి పంపటం, మతం విషయంలో ఆయన వ్యాఖ్యలు ద్రావిడ పార్టీలకూ ఆగ్రహాన్ని తెప్పించాయి.
పంజాబ్‌లో...
పంజాబ్‌కు గవర్నర్ బన్వరీలాల్‌ పురోహిత్‌ కూడా వైస్‌-ఛాన్సలర్‌ నియామకాల అంశంపై ఆప్‌ ముఖ్యమంత్రి భగవంత్‌ మాన్‌కు వ్యతిరేకంగా గళం విప్పారు. దీంతో రాజ్‌భవన్‌కు, రాష్ట్ర ప్రభుత్వానికి మధ్య తీవ్ర వాగ్వాదం చోటు చేసుకున్నది. ప్రభుత్వ వ్యవహారల్లో తరచూ జోక్యం చేసుకుంటున్నారని ముఖ్యమంత్రి కూడా గవర్నర్‌పై ఆగ్రహంతో ఉన్నారు.
తెలంగాణలో..
తెలంగాణలో టీఆర్‌ఎస్‌ ప్రభుత్వాన్ని గద్దె దించి సొంత రాజకీయ పునాదిని ఏర్పర్చుకోవాలని బీజేపీ విశ్వ ప్రయత్నాలను చేస్తున్నది. తమిళనాడు బీజేపీ అధ్యక్షురాలిగా వ్యవహరించిన తమిళిసై సౌందరరాజన్‌ను కేంద్రం ఇక్కడి గవర్నర్‌గా నియమించింది. గవర్నర్ తమిళిసై సౌందర్‌రాజన్‌ చర్యలు ప్రభుత్వాన్ని ఇరుకున పెట్టేవిగా ఉన్నాయి. రాష్ట్ర అసెంబ్లీ ఆమోదించిన తెలంగాణ విశ్వవిద్యాలయాల బిల్లును ఆమో ఆలస్యం చేసింది. బిల్లులోని కొత్త నిబంధనలపై అభ్యంతరాలు వ్యక్తం చేసింది. మొత్తంగా అసెంబ్లీ ఆమోదించిన ఎనిమిది బిల్లులను గవర్నర్ నిలుపుదల చేశారు. అంతటితో కాకుండా, తన ఫోన్‌ ట్యాప్‌ చేయబడిందని కూడా ఆమె ఆరోపించారు. తాను మహిళ అయినందునే టీఆర్‌ఎస్‌ ప్రభుత్వం తనపై వివక్ష చూపుతున్నదన్నారు. ఇటు ఆమె వ్యవహార శైలిపై టీఆర్‌ఎస్‌ కూడా ఆందోళన వ్యక్తం చేసింది. పాలక పార్టీ నిర్ణయాలు లోపాల పుట్టగా ప్రజల్లో ఒక అభిప్రాయాన్ని కల్పించటానికే గవర్నర్ ఇలా వ్యవహరిస్తున్నారనీ, పూర్తిగా బీజేపీకి అనుకూలంగా వ్యవహరిస్తున్నారని ఇక్కడి కొందరు రాజకీయ నాయకులు ఆరోపించారు.
రాజ్యాంగ పరిరక్షణలో గవర్నర్‌ల పాత్ర కీలకమని రాజకీయ విశ్లేషకులు, నిపుణులు తెలిపారు. అయితే, రాజ్యాంగంపై ప్రమాణం చేసినప్పటికీ పక్షపాత రాజకీయ అజెండాతో వ్యవహరిస్తున్నారన్నారు. ప్రపంచంలోనే అతిపెద్ద ప్రజాస్వామ్య దేశమైన భారత్‌కు ఇది ఎంతమాత్రమూ మంచిది కాదని తెలిపారు. కేంద్రం సమాఖ్య విధానానికి తూట్లు పొడుస్తున్నదన్నారు. మోడీ సర్కారు రాజకీయ ప్రయోజనాలను దూరం పెట్టి దేశ భవిష్యత్తు గురించి ఆలోచించాలని సూచించారు.
