- ఎంబిబిఎస్‌ విద్యార్థిని మృతి
- మరో విద్యార్థికి తీవ్రగాయాలు
భోపాల్‌ : ఢిల్లీలో యువతిని కిలోమీటర్లు ఈడ్చుకెళ్లిన దారుణ ఘటన మరువక మునుపే అలాంటి తరహా మరొక ఘటన చోటు చేసుకుంది. మధ్యప్రదేశ్‌లోని జబల్‌పూర్‌లో జరిగిన ఈ ఘటనలో ఎంబిబిఎస్‌ మూడో సంవత్సరం చదువుతున్న విద్యార్థిని ప్రాణాలు కోల్పోయింది.. పోలీసులు తెలిపిన కథనం ప్రకారం... మధ్యప్రదేశ్‌లోని షాదోల్‌ నివాసి రూబీ థాకూర్‌ జబల్‌పూర్‌లోని నేతాజీ సుభాష్‌ చంద్రబోస్‌ మెడికల్‌ కాలేజ్‌లో ఎంబిబిఎస్‌ చదువుతోంది. తన క్లాస్‌మేట్‌ సౌరవ్‌ ఓజాతో కలసి జబల్‌పూర్‌కి 35 కిలోమీటర్లు దూరంలో ఉన్న భేదాఘాట్‌ జలపాతాన్ని చూసేందుకు వెళ్లింది. తిరుగు ప్రయాణంలో ఒక పెద్ద ట్రక్కు వారిని దారుణంగా ఢ కొట్టింది. బైక్‌ నడుపుతున్న సౌరవ్‌ 20 మీటర్ల దూరంలో పడిపోగా, వెనక కూర్చున్న రూబీ శరీరం ట్రక్‌లో చిక్కుకుపోవడంతో.. సుమారు 100 మీటర్లు ఈడ్చుకుని పోయింది. దీంతో శరీరం నుజ్జునుజ్జయినట్లు పోలీసులు తెలిపారు. గాయపడిన సౌరవ్‌ ప్రభుత్వ ఆస్పత్రిలో చికిత్స పొందుతున్నాడని, ఆయన పరిస్థితి విషమంగా ఉందని పోలీసులు తెలిపారు. దర్యాప్తులో హెవీలోడ్‌ ట్రక్కు వారి బైక్‌ని వెనుక నుంచి ఢ కొట్టినట్లు తేలిందని, ఆ ట్రక్కుని కూడా గుర్తించామని చెప్పారు. నిందితుడి కోసం తీవ్రంగా గాలిస్తున్నట్లు పోలీసులు తెలిపారు.
