- బీజేపీ, ఆప్‌ సభ్యుల నినాదాలతో సభలో గందరగోళం
న్యూఢిల్లీ : ఢిల్లీ మేయర్‌ ఎన్నిక మరోసారి వాయిదా పడింది. మంగళవారం ఢిల్లీ మున్సిపల్‌ కార్పొరేషన్‌ (ఎంసీడీ) సమావేశం కాగా, బీజేపీ, ఆప్‌ కౌన్సిలర్ల నినాదాలతో సభ ఉద్రిక్తంగా మారింది. ఇరు పార్టీల కౌన్సిలర్లు ఇష్టమున్నట్టుగా వ్యవహరించారు. పోటాపోటీ నినాదాలతో సభ హోరెత్తింది. దీంతో సభలో తీవ్ర గందరగోళ పరిస్థితులు నెలకొన్నాయని, ఈ తరుణంలో సభ నిరవధికంగా వాయిదా వేస్తూ ప్రిసైడింగ్‌ అధికారి సత్యశర్మ ప్రకటించారు. ఢిల్లీ మున్సిపల్‌ కార్పొరేషన్‌ మేయర్‌ ఎన్నిక వాయిదా పడటం ఇది రెండోసారి. జనవరి 6న కూడా ఇదే రీతిలో ఎన్నిక ప్రక్రియ ఆగిపోయింది. ఆ రోజు సభ్యుల మధ్య తోపులాట చోటుచేసుకుంది. లెఫ్టినెంట్‌ గవర్నర్‌ వి.కె.సక్సేనా నియమించిన ప్రిసైడింగ్‌ అధికారి సత్యశర్మ మొదట 10మంది నామినేటెడ్‌ కౌన్సిలర్స్‌తో ప్రమాణ స్వీకారం చేయించారు. అయితే మేయర్‌ ఎన్నికలో వారు ఓటు వేయడానికి అనుమతి లేదని ఆప్‌ వెల్లడించింది. క్రితంసారి వారి ప్రమాణ స్వీకారం విషయంలోనూ ఆప్‌ నుంచి తీవ్ర వ్యతిరేకత వ్యక్తమైంది. మేయర్‌ ఎన్నికను బీజేపీ అనుకూలంగా మార్చేందుకు, ఉద్దేశపూర్వకంగానే వారిని నామినేట్‌ చేశారని విమర్శించింది. ఇదిలాఉండగా, జనవరి ప్రారంభంలో సభలో జరిగిన రసాభాసను దృష్టిలో ఉంచుకొని ఈసారి కార్పొరేషన్‌ కేంద్ర కార్యాలయం వద్ద భారీ భద్రతను ఏర్పాటుచేశారు. మార్షల్స్‌ను సిద్ధంగా ఉంచారు. డిసెంబర్‌లో జరిగిన మున్సిపల్‌ కార్పొరేషన్‌ ఎన్నికల్లో ఆప్‌ విజయం సాధించింది. ఇక్కడ 15ఏండ్ల బీజేపీ పాలనను ఆప్‌ ఊడ్చేసింది. మొత్తం 250 వార్డుల్లో మెజార్టీ మార్క్‌ 126ను దాటి..134 స్థానాలను ఆప్‌ కైవసం చేసుకుంది. ఆప్‌ తరఫున షెల్లీ ఒబేరారు మేయర్‌ పదవికి పోటీ పడుతున్నారు. మొదట ఈ పదవి కోసం తాము పోటీ పడమని చెప్పిన బీజేపీ, తర్వాత మాట మార్చింది.