- అదానీ-మోడీ సర్కారుకు వ్యతిరేకంగా భారీ ర్యాలీ
కోజికోడ్‌ : 'దేశాన్ని, రాజ్యాంగాన్ని రక్షించండి.. అదానీ-మోడీ సర్కారుకు బుద్ధి చెప్పండి' అంటూ భారీ ర్యాలీ కేరళలోని కోజికోడ్‌లో నిర్వహించారు. కోజికోడ్‌లోని కెల్యూట్టన్‌ స్టడీ సెంటర్‌ ఆధ్వర్యాన నిర్వహించిన ఈ కార్యక్రమాన్ని ఉద్దేశించి సిపిఎం ప్రధాన కార్యదర్శి సీతారాం ఏచూరి ప్రసంగించారు. మోడీ, అదానీ గ్రూపు భారత జాతీయ జాతీయ వాదం పేరుతో అక్రమాలను కప్పిపుచ్చుకునేందుకు ప్రయత్నిస్తున్నాయన్నారు. 2002లో గుజరాత్‌ మతమారణ హోమంపై బిబిసి డాక్యుమెంటరీ నిజాలను మరోసారి వెలికితీసిందన్నారు. ఈ రెండు సందర్భాల్లోనూ జాతీయ వాదం పేరుతో మాట్లాడుతున్నారని విమర్శించారు.
కేరళలో 'పీపుల్స్‌ రెసిస్టన్స్‌ ర్యాలీ' ప్రారంభం
కేరళ సిపిఎం రాష్ట్ర కార్యదర్శి ఎంవి గోవిందన్‌ నేతృత్వంలో సాగే ది పీపుల్స్‌ రెసిస్టన్స్‌ ర్యాలీ సోమవారం ప్రారంభమయింది. కసర్‌గాడ్‌ జిల్లాలోని కుంబ్లాలో కేరళ ముఖ్యమంత్రి పినరయి విజయన్‌ జెండా ఊపి ఈ ర్యాలీని ప్రారంభించారు. ఎంవి గోవిందన్‌ నేతృత్వంలో వచ్చే నాలుగు వారాల పాటు కేరళలోని అన్ని జిల్లాల మీదుగా ఈ యాత్ర సాగుతోంది. కేంద్ర ప్రభుత్వ ప్రజా వ్యతిరేక విధానాలు, మతతత్వానికి వ్యతిరేకంగా ఈ యాత్రను నిర్వహిస్తున్నారు. యాత్ర ప్రారంభంలో రాష్ట్ర మంత్రులు, ఎమ్మెల్యేలు పాల్గొన్నారు.
