- ప్రధాని మోడీకి ఆప్‌ అధినేత సూటి ప్రశ్న..
న్యూఢిల్లీ: మద్యం కుంభకోణం కేసులో ఏమీ లేని సిసోడియాపై అన్ని కేసులు పెట్టినప్పుడు.. నోట్ల గుట్టలు దొరికిన కర్నాటకలో బీజేపీ ఎమ్మెల్యేను ఎందుకు అరెస్టు చేయలేదు? అని ఢిల్లీ సీఎం కేజ్రీవాల్‌ ప్రశ్నించారు. తాజాగా ప్రధాని మోడీకి ఆప్‌ అధినేత సూటి ప్రశ్న వేశారు. కర్నాటక లో బీజేపీ ఎమ్మెల్యే కుమారుడి 'లంచావతరం' ఘటనను ఉదహరిస్తూ తీవ్ర విమర్శలు గుప్పించారు.
''ప్రధాని జీ.. మనీశ్‌ సిసోడియా నివాసంలో సోదాలు జరిపినప్పుడు అధికారులకు ఏం లభించలేదు. అయినా సీబీఐ, ఎన్‌ఫోర్స్‌మెంట్‌ డైరెక్టరేట్‌ (ఈడీ)లోని అన్ని సెక్షన్ల కింద కేసులు పెట్టి ఆయనను అరెస్టు చేశారు. అదే మీ పార్టీ ఎమ్మెల్యే ఇంట్లో సోదాలు చేస్తే పెద్ద మొత్తంలో నగదు బయటపడింది. అయినా ఆయనను ఎందుకు అరెస్టు చేయలేదు? ఇంకెప్పుడూ అవినీతిపై పోరాటం గురించి మాట్లాడకండి. ఆ మాటలు మీకు సరిపోవు'' అంటూ ఘాటు విమర్శలు చేశారు.
