- ఆర్థిక సాయం అందే మార్గాలను కూడా మూసివేయాలి
- ఎస్‌సిఓ సదస్సులో జై శంకర్‌ స్పష్టీకరణ
బెనాలిమ్‌ (గోవా): సరిహద్దు ఆవలి తీవ్రవాదంతో సహా ఏ రూపంలోని తీవ్రవాదాన్నైనా నిర్మూలించాల్సిందేనని విదేశాంగ మంత్రి జై శంకర్‌ అన్నారు. తీవ్రవాద కార్యకాలాపాలకు ఆర్థిక సాయం అందే మార్గాలను కూడా మూసివేయాల్సిందే నన్నారు. గోవాలో జరుగుతున్న షాంఘై సహకార సంస్థ (ఎస్‌సిఓ) సదస్సుకు అధ్యక్షత వహించిన ఆయన శుక్రవారం మాట్లాడారు. పాకిస్తాన్‌ విదేశాంగ మంత్రి బిల్వాల్‌ భుట్టో సమక్షంలోనే ఆయన తీవ్రవాదంపై తమ వైఖరిని గట్టిగా వినిపిం చారు. ఒకపక్క ప్రపంచం కోవిడ్‌ మహమ్మారితో, తదనంతర పర్యవసానాలతో సతమతమవుతున్నా కూడా తీవ్రవాద ముప్పు అడ్డూ అదుపు లేకుండా సాగిందని విమర్శించారు. పరో క్షంగా పాకిస్తాన్‌ను ప్రస్తావిస్తూ ఆయన ఈ వ్యాఖ్యలు చేశారు. తీవ్రవాదం నుండి దృష్టి మళ్ళించడం వల్ల భద్రతా ప్రయోజనాలకు విఘాతం కలుగు తుందని హెచ్చరించారు. తీవ్రవాదానికి ఎలాంటి సమర్ధింపు వుండరాదని భారత్‌ ధృఢంగా విశ్వసిస్తోందన్నారు. ఈ ముప్పును ఎదుర్కొనడమనేది ఎస్‌సిఓ ఆదేశాల్లో ఒకటని ఆయన పేర్కొన్నారు. ప్రగతికి అను సంథానత అనేది చాలా కీలకమని ఆయన నొక్కి చెప్పారు. అన్ని సభ్య దేశాల సార్వభౌమాధికారాన్ని, ప్రాదేశిక సమగ్రతను తప్పనిసరిగా గౌరవించాలని అన్నారు. ఈ సమావేశానికి చైనా, రష్యా విదేశాంగ మంత్రులతో సహా ఇతర సభ్య దేశాల విదేశాంగ మంత్రులు కూడా హాజరయ్యారు. ఆఫ్ఘనిస్తాన్‌లో పరిస్థితులను కూడా జైశంకర్‌ ప్రస్తావించారు. ఎస్‌సిఓలో సంస్కరణలు తీసుకువచ్చి, ఆధునీకరిం చాలని, అప్పుడే మరింత సమకాలీన దృక్పథం రావడానికి దోహదపడుతుందని, దాని కోసం భారత్‌ తీవ్రంగా కృషి చేస్తుందని చెప్పారు. ఇంగ్లీషును ఎస్‌సిఓ మూడవ అధికార భాషగా తీసుకు రావడానికి నిర్మాణాత్మక చర్యలు తీసుకుంటున్నామని చెప్పారు. ఇప్పటివరకు చైనీస్‌, రష్యన్‌లు మాత్రమే అధికార భాషలుగా వున్నాయి. స్టార్టప్‌లు, వినూత్న అన్వేషణలపై, సాంప్రదాయ మెడిసిన్‌పై కొత్తగా రెండు వర్కింగ్‌ గ్రూపులను ఏర్పాటు చేయాలన్న భారత్‌ ప్రతిపాదనకు సభ్య దేశాలు మద్దతివ్వడాన్ని ఆయన అభినందించారు. కాగా ఈ సదస్సు సందర్భంగా భారత్‌తో ఎలాంటి ద్వైపాక్షిక సమావేశం వుండబోదని ముందుగానే చెప్పిన పాక్‌మంత్రి బిల్వాల్‌తో మర్యాదపూర్వకంగా జై శంకర్‌ కరచాలనం చేశారు.
