తెలంగాణ సారస్వత పరిషత్తు జ్ఞానపీఠ పురస్కార గ్రహీత డా.సి.నారాయణరెడ్డి పేరుతో ఏటా ప్రదానం చేస్తున్న సాహితీ పురస్కారానికి ఈ ఏడాది ప్రముఖ కవి జూకంటి జగన్నాథం ఎంపికయ్యారు. పాతాళ గరిగె, ఇండియా ప్రైవేట్‌ లిమిటెడ్‌, గంగడోలు, బొడ్డుతాడు, తల్లి కొంగు, గెజిట్‌, పిడికెడు కలలు దోసెడు కన్నీళ్ళు మొదలైన కవితా సంపుటాలతో తెలంగాణ కవిత్వపు వాణిని బలంగా వినిపించిన జూకంటి డా.సి.నా.రె జన్మించిన రాజన్న సిరిసిల్ల జిల్లావాసి కావడం విశేషం. ఈ నెల 29 న తెలంగాణ సారస్వత పరిషత్తు, సినారె కుటుంబం ఆధ్వర్యంలోని సుశీలా నారాయణ రెడ్డి ట్రస్టు సంయుక్తంగా నిర్వహించనున్న సినారె 90వ జయంత్యుత్సవంలో ఈ పురస్కారం ప్రదానం చేయనున్నట్లు పరిషత్తు అధ్యక్షులు ఆచార్య ఎల్లూరి శివారెడ్డి, ప్రధాన కార్యదర్శి డా.జుర్రు చెన్నయ్య ఓ ప్రకటనలో పేర్కొన్నారు.