పల్లెల్లో శ్రమించి పండించే రైతులు
కుట్రలను ఎదురొడ్డి పొలంవిడిచి
నిరసన గళాలతో రోడ్డెక్కటం..
కులవత్తులు కూడు పెట్టక
కూలిబతుకు నయమని
నగరానికి వలస వచ్చిన
నలిగిపోయిన దీనులు..
అడవి కడుపులో ఆదమరిచి ఆనందంగా బ్రతికే ఆదివాసులు
స్వార్థ శక్తుల కుట్రలకు
బెదిరి చెదిరిపోవటం...
అందమైన బాల్యం బందీ అయి
చదువుల గంధం ఆవిరై
ఉద్యోగం, వ్యాపారం అన్నీ
కంప్యూటర్‌ తెరలకు చిక్కి
జనజీవనం అతలాకుతలమై
రెండేళ్ల తప్పని అజ్ఞాత జీవితంలో
బ్రతకలేక పోతున్న సామాన్యుడు..
ఆరు పదుల ఆటుపోట్ల జీవనంలో
తడిఆరని తీరంలా నిశ్చలసాక్షినై..
దుఃఖాల చీకట్లనూ
ఆనందాల వెలుగులను
సమంగా అనుభవించిన జీవిని
వసంతకాల మేఘ గర్జనలను
తూర్పు పవన ఈదురు గాలులను
అస్తిత్వ పోరాటాల ఉప్పెనలను మిలియన్‌ మార్చ్‌ లకు
కదిలి నడిచిన తరం నాది
కాలాన్ని కొత్తగా కోవిడ్‌ పూర్వ
కోవిడ్‌ అనంతర దశలుగా...
దొరకని ప్రాణ వాయువు తోడుగా
సంజీవిని టీకాలతో ఊపిరి పీల్చుక
బ్రతుకుతున్న యుగం మనది
బ్రతును ప్రేమిస్తూ
సంఘర్షణే జీవితమై
పోరాటమే ఊపిరిగా
మనిషిగా బ్రతుకుతూ
మానవత్వాన్ని స్వాగతించే
పాత కాలపు జీవిని నేనే !
- డా|| కె. దివాకరా చారి, 9391018972
