పెట్టుబోతలకు భయపడి
పొట్టలోనే పాతి పెడితే
ఎవరికి తెలుసు
మదర్‌ థెరిస్సా మళ్లీ
మన భారత్‌ను పునీతం చేస్తుందేమో
అసలు బతకనిస్తే కదా తెలిసేది

ప్రేమ ఒప్పుకోలేదని అసూయతో
ప్రాణంపై ఆసిడ్‌ కుమ్మరిస్తే
ఎవరికి తెలుసు
కల్పనా చావ్లా లా
అంతరిక్షంపై జెండా ఎగుర వేసునేమో
ఆమె ఆశయాన్ని బతకనీయాలీ కదా

కట్న కానుకలు సరిపోలేదని
కాళ్ళ పారాణి ఆరక ముందే అగ్నికి అర్పిస్తే
ఎవరికి తెలుసు
అవతార పురుషునికి జన్మనిచ్చి
అందరి కష్టాలను కడతేర్చేదేమో
బతుకునిచ్చే దేవతను బతకనీయాలి కదా

మత్తు మందులో మాటు వేసి
మానవత్వాన్ని నీచంగా నలిపెస్తే
ఎవరికి తెలుసు
ఎన్ని స్టార్ట్‌అప్‌లు మొదలు పెట్టి
ఎందరికి నీడను ఇచ్చేదో
బతుకు కలలను బతక నీయాలి కదా

విశ్వాన్ని విస్తరించి వికసింపచేసే
బతుకమ్మ పువ్వులను బతక నీయండి
ఎవరికి తెలుసు
బతుకమ్మల శోకం
బతుకులను శూన్యం చేస్తుందేమో..

- దాసరి మోహన్‌
  9985309080