సీకట్ల లేసి చీపిరి వట్టింది మల్లక్క....
పాలువిండి బర్రెల్లగొట్టిండు పాపన్న...

పొయ్యలికి పాలెచ్చవెట్టింది పుల్లమ్మ....!!
కోళ్లనిడ్చి కొట్టమూడ్చిండు కొమురయ్య....!!

పెరట్ల తోటకూర ఏరుకచ్చే కడింటి లింగమ్మ...!!
ఛాయబొట్టు తాగి కైకిల్లోల్ల జాడకువాయే
చింతకింది చంద్రన్న....

సల్లచేసి నెయ్యచ్చవెట్టే సుక్కమ్మ....
ఎడ్లకి నీళ్ళు వెట్టి బండి కట్టిండు సూరన్న....!!

నాలుగు వెతుకులు తిని
సద్దిమూటలు కట్టింది కాంతక్క...!!
దుడ్డేకి గడ్డేసి మందుబస్తాలు
బండ్లేసిండు మొండన్న...!!

కట్టమీంచి పోతాంటే
పొలాలన్నీ కన్నబిడ్డలోలే కనపడే...
కట్టం చేసి కడుపు నింపుకొని
రెండెకరాల పొలాన్ని నాలుగెకరాలు చేసుకొని...

పైస పైసా కూడవెట్టి... పాలోల్ల ముందు
పదొద్దులు చెయ్యి సాపకుండ
బతికిందే బతుకట....!!!

- తుమ్మల కల్పన రెడ్డి, 9640462142