తిట్టండి తిట్టండి
ఇంకా తిట్టండి బాగా తిట్టండి
తిట్లు మాకు కొత్తేం గావు!
కడుపు కాలిన వాళ్ళంతా తిట్టండి
నోటికొచ్చిన తిట్లన్నీ తిట్టండి
మీ తిట్లు మాకు
న్యూట్రీషన్‌ కలిపిన అట్లు!
తిట్లెవరికీ ఊరకే రావు
ఎవరి పొట్టా గొట్టకపోతే
ఎవరు మాత్రం ఎందుకు తిడతారు?
తిట్లు తినే పని
అంత సులభమైనదేం కాదు!
కూల్చాలి కుట్రలు పన్నాలి
మంచు కొండల మధ్య కూడా
ఆరని మంటలు రేపాలి!
మాట వింటే సరి
మూటలకు లొంగినా సరే
వేలెత్తి చూపితేనే వేలు విరుస్తాం
కళ్ళెత్తి చూస్తేనే కుళ్ళ బొడుస్తాం!
ఏదీ ఏమీ ఎవరికీ చేయకపోతే
ఊరకే తిట్లెవరు తిడతారు?!
వద్దు వద్దూ అన్నా
ఎవరెంత మొత్తుకున్నా
అన్నీ దేశ భక్తిని కలిపి
అమ్మి పారేస్తాం!
ఉపాధులూ ఉద్యోగాలూ అన్నీ పీకేసి
కొదర్ని కుబేర స్వాముల్ని చేస్తాం!
తిట్లకు అలవాటు పడని వారే
అర్ధాంతరంగా నిష్క్రమిస్తారు!
సింగిల్‌ డిజిట్తో ప్రారంభమైన ప్రయాణం
తిట్లు తిని తినే కదా
పార్లమెంట్‌ మెట్లెక్కింది?!
తిట్టండి తిట్టండి
ప్లీజ్‌ కొంచెం కొత్తగా తిట్టండి
చే జారిన చోటల్లా
దృతరాష్ట్ర కౌగిలి విస్తరించాల్సి ఉంది!
తిట్టండి తిట్టండి
తిట్లెవరికీ ఊరకే రావు!!
- కోట్ల వెంకటేశ్వర రెడ్డి 9440233261
