శతాబ్దాల పరిణామమనే కెమెరా
ఘటనల ఫోటోలను తీసి చూపిస్తది
కాలాన్ని సెకండ్లుగా మార్చుకొని
పాఠాలు చదువమంటయి
పాఠాల సారాంశాన్ని బట్టీ పట్టితే
లాభం లేదంటది
దాన్ని వినియోగిస్తేనే జీవితం
వినియోగించడం మరిచిపోతే
అంధకార విశ్వరూపమే
జీవించని క్షణాలు బెదిరిస్తుంటయి
జీవించని క్షణాల అంతరంగాన్ని తట్టిలేపి
నడిపించడమే జీవితానికి పునాది
ఎదురు చూపులు ఫలితాన్ని అందించినట్లే
జీవించని క్షణాల్లో తగిలినగాయాలు
దృశ్యమానమై బాధలను జ్ఞాపకం చేస్తయి
వచ్చిపోయే వసంతాలు ఎక్కిరిస్తయి
శరత్తు విపత్తుగామారి రొమ్ము విరుస్తుంది
శిశిరం వెన్నంటి ఉండి దుఃఖాల సరిగమలను పలికిస్తది
కాలం క్షణికం అదే సమయంలో శాశ్వతం కూడా
గతాన్ని జ్ఞాపకంగా మిగిలించి ముందుకు పోతుంది
ముందుకుపోయే కాలాన్ని
ఆపే బెత్తం నీ చేతిలో లేదు
కాలాన్ని నిలదీయడమే నీవు చేయాల్సిన పని
అప్పుడే జీవించని క్షణాలు మాయమై
జీవించబోయే క్షణాలు
బతుకు పూలమాలికలై
గళాన్ని అలంకరిస్తయి
మనసును పూయిస్తయి
మనిషిగా నిలబెడుతయి

- వల్లభాపురం జనార్దన
  9440163687