కాలం సృష్టించిన ప్రతికూల పరీక్షలో
విధి ఆడుతున్న పులి మేకలాటలో
నిత్యం మేకలు బలవుతూనే ఉన్నాయి

పులి కట్ల పడడం లేదు
దానిని బంధించే బలం మేకలకు లేక
ప్రాణరక్షణ కోసం పారిపోతూనే ఉన్నాయి

గాండ్రించిన పులి అరుపులకు
సర్వ జగత్తు ఉలిక్కిపడింది

ఇంట్లో దాక్కున్న తెలివైన మేకలు
పులి కంట కనపడక తప్పించుకున్నా
ఎన్నాళ్ళు ఈ పిరికి బతుకని లోలోన
కుమిలిపడుతున్నాయి

మాకేం భయమని బయట తిరిగే
మూర్ఖపు మేకలు పులి పంజాకు
ప్రాణాలను బలి ఇస్తున్నాయి

పచ్చటి వనాన్ని మరుభూమిగా మారుస్తూ
రక్త పిశాచిలా రంకెలేసి దుంకుతున్న
పెద్ద పులి వేటకు
మేకల మంద పలుచనైనది

చేతులు ఎత్తేసిన కాపర్లను చూసి
బిక్కుబిక్కుమంటూ ఏడుస్తున్నాయి

అయినా పులి వేటాడుతూనే ఉంది
దొరికిన మేకల్ని దర్జాగా తింటూనే ఉంది

పులి మేకల జూదంలో ఎప్పుడూ
పులే గెలవాలా ?
పులి కట్టడికి మేకల ప్రయత్నాలు
నిరంతరం ఓడుతూనే ఉన్నాయి

పులిని బంధించే రోజు కోసం
మేకలు ఎదురుచూస్తూనే ఉన్నాయి
- దుర్గమ్‌ భైతి, 9959007914