బతుకమ్మతో ఎమ్మెల్యే హరిప్రియ సందడి
నవతెలంగాణ-గార్ల
మండలంలోని అన్ని గ్రామాల్లోనూ గురువారం సద్దుల బతుకమ్మ వేడుకలను ఘనంగా నిర్వహించారు. మండల కేంద్రంలో, సీతంపేటలో సర్పంచ్‌ల ఆధ్వర్యంలో సద్దుల బతుకమ్మ నిమజ్జన వేడుకలో ఇల్లందు ఎమ్మెల్యే బానోత్‌ హరిప్రియ, ఎంపీపీ మూడ్‌ శివాజీ చౌహన్‌, జెడ్పీటీసీ జాటోత్‌ ఝాన్సీ లక్ష్మీ, సర్పంచ్‌ అజ్మీరా బన్సీలాల్‌ పాల్గొని సందడి చేశారు. ఈ సందర్భంగా ఎమ్మెల్యే హరిప్రియ మాట్లాడారు. బతుకమ్మ పండుగను అన్ని వయస్కుల మహిళలు, ప్రజాప్రతినిధులు వివిధ రకాల పూలతో అలంకరించిన బతుకమ్మలను అందంగా పేర్చి నిమజ్జనం నిర్వహించడం అభినందనీయమని తెలిపారు. తెలంగాణ సంస్కతి, సాంప్రదాయాలను భావితరాలకు అందించేలా వేడుకలు నిర్వహించడం ప్రశంసనీయమని చెప్పారు. పట్టణ వీధుల్లో బతుకమ్మ ప్రదర్శన నిర్వహించి బతుకమ్మ ఘాట్‌ల వద్ద పాకాల ఏటిలో నిమజ్జనం చేశారు. బ్యాండ్‌ మేళాలు, డీజే, పాటలతో మండలంలోని అన్ని గ్రామ పంచాయతీలలో బతుకమ్మలు వేడుకగా నిర్వహించారు. వేడుకల్లో సర్పంచ్‌లు సక్రు, జ్యోతి, భారతి, ప్రవళిక, మోతీలాల్‌, ఉష, శంకర్‌, లావణ్య, రుక్మిణీ, జానకిరాణి, జ్యోతి, బుజ్జి, తారాబాయి, కమిలి, బాబురావు, కుంతి, ఎంపీటీసీలు రమేష్‌, సుజాత, మంజుల, టీఆర్‌ఎస్‌ నాయకులు లక్ష్మణ్‌నాయక్‌, రాధాకష్ణ, ఉపసర్పంచ్‌ మహేశ్వర్‌రావు, తదితరులు పాల్గొన్నారు.
