నవతెలంగాణ-కేసముద్రం రూరల్‌
రోడ్డు ప్రమాదంలో ముగ్గురు వ్యక్తులు మృతి చెందిన ఘటన మహబూబాబాద్‌ జిల్లాలోని కేసముద్రంలో శుక్రవారం మధ్యాహ్నం చోటు చేసుకుంది. వివరాలిలా.. కేసముద్రం మండలంలోని కట్టుకాల్వ తండాకు చెందిన తరుణ్‌, నర్సింహ ఒక ద్విచక్ర వాహనంపై వస్తుండగా కేసముద్రం స్టేషన్‌కు చెందిన చిదిరాల నరేష్‌ చంద్ర మరో ద్విచక్ర వాహనంపై ఎదురెదురుగా రాగా స్థానిక ఫ్లైఓవర్‌పై మధ్యాహ్నం 3 గంటలకు ప్రమాదం జరిగింది. రెండు ద్విచక్ర వాహనాలు ఒకదానికి మరొకటి ఢకొీనగా తరుణ్‌, నర్సింహ అక్కడికక్కడే మృతి చెందారు. తీవ్ర గాయాలపాలైన నరేష్‌ చంద్రను ఆస్పత్రికి తరలిస్తుండగా అతడు మార్గమధ్యలో మృతి చెందాడు. మృతదేహాలను పోస్టుమార్టం కోసం జిల్లా కేంద్రంలోని ఏరియా ఆస్పత్రికి తరలించి కేసు దర్యాప్తు చేస్తున్నట్టు ఎస్సై రమేష్‌బాబు తెలిపారు.
ఎమ్మెల్యే నివాళ్లు
మహబూబాబాద్‌ : తరుణ్‌, నర్సింహ, నరేష్‌ చంద్ర మృతి చెందగా జిల్లా కేంద్రంలోని ఏరియా ఆస్పత్రిలోని మార్చురీ వద్ద వారి మృతదేహాలకు ఎమ్మెల్యే బానోత్‌ శంకర్‌నాయక్‌ నివాళ్లర్పించారు. మృతుల కుటుంబీకులను పరామర్శించారు. ప్రమాదం పట్ల తీవ్ర దిగ్భ్రాంతి వ్యక్తం చేశారు. ఎమ్మెల్యే వెంట మున్సిపల్‌ చైర్మెన్‌ డాక్టర్‌ రామ్మోహన్‌రెడ్డి, వైస్‌ చైర్మెన్‌ ఫరీద్‌, ఎంపీపీ చంద్రమోహన్‌, మార్నేని వెంకన్న, చిట్యాల జనార్ధన్‌, గోగుల రాజు, మార్నేని రఘు, బోనగిరి గంగాధర్‌, వీరూనాయక్‌, సాయి ఉన్నారు.
