- సీఐటీయూ జిల్లా ఉపాధ్యక్షులు చిట్యాల సోమన్న
నవతెలంగాణ-పాలకుర్తి
కార్మికొద్యమాలనే తన ఊపిరిగా మలుచుకున్న మహౌన్నతమైన కార్మికోద్యమ నేత పర్సా సత్యనారాయణ అని సీఐటీయూ జిల్లా ఉపాధ్యక్షులు చిట్యాల సోమన్న అన్నారు. ఆదివారం పాలకుర్తి మండల కేంద్రంలో వీరనారి తెలంగాణ రైతాంగ సాయుధ పోరాట యోధురాలు ఐలమ్మ స్మారక భవనం లో కార్మికోద్యమ నేత సత్యనారాయణ వర్ధంతిని పురస్కరించుకొని సత్యనారాయణ చిత్రపటానికి పూలమాల వేసి ఘనంగా నివాళులర్పించారు. ఈ సందర్భంగా సోమన్న మాట్లాడుతూ ఎర్రజెండాకే వన్నెతెచ్చిన మహానాయకుడు పర్స సత్య నారాయణ అని అన్నారు. సింగరేణి కార్మికులకు అండగా నిలిచి పోరాటం చేసిన మహా వీరుడు సత్యనారాయణ అని కొనియాడారు. కేంద్ర ప్రభుత్వం అనుసరిస్తున్న ప్రజాస్వామిక వ్యతిరేక విధానాలను నిరసిస్తూ ప్రజాస్వామిక వర్గ సమైక్యంగా సమరశీల పోరాటాలు నిర్వహించాలని పిలుపునిచ్చారు. ప్రభుత్వ రంగ సంస్థల అన్నింటిని స్వదేశీ విదేశీ కార్పొరేట్‌ శక్తులకు కట్టబెడుతున్నారని విమర్శించారు. నిరుపేద కుటుంబంలో జన్మించిన సత్యనారాయణ కార్మికో ద్యమనేతగా రాష్ట్రస్థాయి వరకు ఎదిగి ప్రజలకు సేవలందించారని గుర్తు చేశారు. వారి స్ఫూర్తితో కార్మికులు ఐక్య ఉద్యమాల ద్వారా కార్మిక వ్యతిరేక విధానాలను తిప్పికొట్టాలని పిలుపునిచ్చారు. ఈ కార్యక్రమంలో బి వెంకన్న, ఎండి పరిదు,బి. యాకన్న, ఎండి మైబు,ఎస్‌ అబ్బాస్‌, షేర్‌ సమ్మయ్య,సాయిలు, వెంకన్న తదితరులు పాల్గొన్నారు.
