నవతెలంగాణ-కొత్తగూడ
లక్ష్యసాధనలో వెనకడుగు వేయకుండా పట్టుదల, సంకల్పం, కఠోర శ్రమ లతోపాటు ప్రణాళిక ప్రకారం చదివితే విజయం మీ సొంతం అవుతుందని మున్సిపల్‌ కమిషనర్‌(వీఆర్‌ఎస్‌) భూక్య దేవ్‌ సింగ్‌ అన్నారు. ఆదివారం మండల కేంద్రంలోని గ్రామ పంచాయతీ ఆవరణలో మండలంలోని వివిధ గ్రామాల నుండి వచ్చిన 82 మంది నిరుద్యోగ యువతీ యువకులకు గ్రూప్‌ వన్‌, సబ్‌ ఇన్స్పెక్టర్‌ ఆఫ్‌ పోలీస్‌, పోలీస్‌ కానిస్టేబుల్‌ పోటీ పరీక్షలకు కావలసిన స్టడీ మెటీరియల్‌ ను అందజేశారు. ఈ సందర్భంగా ఆయన మాట్లాడుతూ ప్రతి ఒక్కరూ సమయాన్ని వధా చేయకుండా ప్రతి నిమిషాన్ని సద్వినియోగం చేసుకుంటూ కష్ట పడిన వారే తప్పకుండా విజయం దిశగా అడుగులు వేస్తారని అన్నారు.క్రమశిక్షణతో చదివినవారే విజేతలుగా నిలుస్తారని, మీ భవిష్యత్తు మీ చేతుల్లోనే ఉందని దానిని ఎలా నిర్దేశించుకోవాలన్నది మీ పైనే ఆధారపడి ఉంటుందన్నారు.ఈ కార్యక్రమంలో సామాజికవేత్త దొంతి విజేందర్‌ రెడ్డి, నాగన్న,పోరిక రాహుల్‌, రాజ్‌ కుమార్‌, తదితరులు పాల్గొన్నారు.
