- జిల్లా కలెక్టర్‌ ఎస్‌ కష్ణ ఆదిత్య
నవతెలంగాణ - ములుగు
తెలంగాణ సమైక్యత వజ్రోత్సవ వేడుకలను ములుగు జిల్లాలో మూడు రోజులపాటు ఘనంగా నిర్వహించనున్నామని జిల్లా కలెక్టర్‌ ఎస్‌ కష్ణ ఆదిత్య తెలిపారు. జిల్లా కలెక్టర్‌ సమావేశ మందిరంలో గురువారం ఏర్పాటు చేసిన విలేకరుల సమావేశంలో కలెక్టర్‌ మాట్లాడారు. నేడు ములుగు జిల్లా కేంద్రంలోని ప్రేమనగర్‌ నుండి ప్రభుత్వ డిగ్రీ కళాశాల వరకు 15వేల మందితో పెద్ద ఎత్తున ర్యాలీ నిర్వహించి డిగ్రీ కళాశాల వద్ద సాంస్కతిక కార్యక్రమాలు నిర్వహించనున్నామన్నారు. 17న జిల్లా కలెక్టరేట్లో వజ్రోత్సవ వేడుకల ముఖ్య అతిథి ఎమ్మెల్సీ ప్రభుత్వ విప్‌ ప్రభాకర్‌ రావుతో జాతీయ పతాకావిష్కరణ కార్యక్రమం ఉంటుందని తెలిపారు. 18 న వజ్రోత్సవ ముగింపు వేడుకలను వెంకటాపూర్‌ మండలం పాలంపేట గ్రామంలోని యునెస్కో గుర్తింపు పొందిన రామప్ప దేవాలయం ప్రాంగణంలో నిర్వహించేందుకు అన్ని ఏర్పాట్లు చేసినట్లు తెలిపారు. ముగింపు ఉత్సవాలకు మంత్రులు ఎర్రబెల్లి దయాకర్‌ రావు, సత్యవతి రాథోడ్‌ ముఖ్య అతిథులుగా హాజరుకానున్నట్లు తెలిపారు. లేజర్‌ షో , రామప్ప వైభవంతో పాటు ములుగు జిల్లాలపై చిత్రీకరించిన ప్రత్యేక ఆడియో విజువల్‌ ప్రదర్శన ఉంటుందన్నారు. ప్రముఖ సంగీత వాయిద్య కారుడు శివమణి, సినీ నటులు తనికెళ్ల భరణి, సంగీత దర్శకులు విశ్వతో సాంస్కతిక కార్యక్రమాలను నిర్వహించనున్నట్లు తెలిపారు. జిల్లా ప్రజలు అందరూ పాల్గొని విజయవంతం చేయాలని కోరారు. రాష్ట్రంలో చివరిగా ఏర్పడిన ములుగు జిల్లా సమగ్ర అభివద్ధికి ప్రభుత్వం కషి చేస్తుందని తెలిపారు. జిల్లా కేంద్రానికి చుట్టుపక్కల రెండు కిలోమీటర్ల దూరంలో అన్ని కార్యాలయాల భవనాలు నిర్మింప చేసేందుకు స్థల సేకరణ పూర్తయిందని తెలిపారు. ప్రభుత్వ డిగ్రీ కళాశాల పక్కన మెడికల్‌ కళాశాల తో పాటు సమీకత కలెక్టరేట్‌ కార్యాలయానికి స్థలాన్ని కేటాయించమని అన్నారు. ఈ నెలాఖరు వరకు సమీకత కలెక్టరేట్‌ కార్యాలయ నిర్మాణ పనుల శంకుస్థాపన కార్యక్రమాన్ని మంత్రులచే ప్రారంభిస్తామని తెలిపారు. బండారుపల్లి శివారులో మినీ స్టేడియం నిర్మాణంతో పాటు ఆర్టీవో కార్యాలయం, ఇంటెలిజెన్స్‌ కార్యాలయం, గిరిజన సంక్షేమ శాఖ ఆధ్వర్యంలో ప్రస్తుతం ఓగులాపూర్‌ లో నడుస్తున్న ప్రభుత్వ మహిళా డిగ్రీ కళాశాల భవన నిర్మాణానికి స్థలాన్ని సేకరించినట్లు తెలిపారు. ములుగు మండలం ఇంచర్ల ఎర్రి గట్టమ్మ దేవాలయ సమీపంలో ఫుడ్‌ ప్రాసెసింగ్‌ యూనిట్ల కోసం స్థలాన్ని కేటాయించమన్నారు.అదేవిధంగా ఇంచర్ల సమీపంలో సెరికల్చర్‌ శాఖ ఆధ్వర్యంలో ఉన్న భూమిలో మాడల్‌ టూరిజం విలేజ్ని నిర్మించేందుకు ప్రణాళికలు సిద్ధం చేశామన్నారు. జిల్లా కేంద్రంలోని వ్యవసాయ శాఖకు సంబంధించిన గోదాములో సెంట్రల్‌ డ్రగ్‌ స్టోర్‌ ఏర్పాటు చేయడంతో పాటు వైద్య ఆరోగ్యశాఖకు సమావేశ మందిరాన్ని ఏర్పాటు చేశామన్నారు. జిల్లా కేంద్రంలో ఆర్టీసీ బస్సు డిపోను ఏర్పాటు చేసేందుకు ప్రభుత్వ స్థలాన్ని గుర్తించే పనిలో ఉన్నామని తెలిపారు. యునెస్కో గుర్తింపు పొందిన రామప్ప దేవాలయానికి మరో రహదారిని రామప్ప నుండి నరసాపూర్‌ మీదుగా నిర్మిస్తామన్నారు. జిల్లా వ్యాప్తంగా ఉన్న రోడ్ల నిర్మాణానికి నిధులు మంజూరు చేశామని త్వరలో పనులు ప్రారంభిస్తామని తెలిపారు. ఘటమ్మ దేవాలయం నుండి మహమ్మద్‌ గౌస్‌ పల్లి వరకు జాతీయ రహదారి పనులు కూడా త్వరలో ప్రారంభించనున్నట్లు తెలిపారు. జిల్లాలో బ్రాహ్మణపల్లి, ఏటూరు నాగారం, జవహర్‌ నగర్‌ టోల్‌ ప్లాజా వద్ద చెక్పోస్టులను సైతం ఏర్పాటు చేస్తున్నామని తెలిపారు. జవహర్‌ నగర్‌ టోల్‌ ప్లాజా వద్ద ఆటోమేటెడ్‌ సెన్సార్‌ ను ఏర్పాటు చేస్తున్నామన్నారు. రామప్ప విశిష్టతను ప్రపంచానికి తెలియజేసేందుకు ఈనెల 19వ తేదీ నుండి అక్టోబర్‌ ఒకటో తేదీ వరకు వాలంటీర్లకు ప్రత్యేక శిక్షణ కార్యక్రమాన్ని నిర్వహిస్తున్నట్లు తెలిపారు. కాకతీయ హెరిటేజ్‌ ట్రస్ట్‌ ఆధ్వర్యంలో ఆయా ప్రాంతాలలో రామప్ప విశిష్టతపై ప్రచారం నిర్వహిస్తారని అన్నారు. డీపీఆర్‌ఓ యండి రఫిక్‌ పాల్గొన్నారు.