- ప్రభుత్వ చీఫ్‌విప్‌ దాస్యం వినయ్‌భాస్కర్‌
నవతెలంగాణ-హన్మకొండ
తెలంగాణ ఉద్యమంలో విద్యార్థి ఉద్యమకారుల చరిత్ర మరువలేనిదని వారికి త్వరలో సముచిత స్థానం కల్పిస్తా మని ప్రభుత్వ చీఫ్‌విప్‌ దాస్యం వినయ్‌భాస్కర్‌ అన్నారు. తెలంగాణ దీక్ష దివాస్‌ సందర్భంగా పశ్చిమ నియోజకవర్గంలో తెలంగాణ పోరాటం చేసిన విద్యార్థి, యువజన ఉద్యమకారుల అలయ్‌బాలయ్‌ కార్యక్రమం హనుమకొండలోని రెవెన్యూ అతిథి గృహంలో నిర్వహించారు.ఈ కార్యక్రమానికి ముఖ్య అతిథులుగా వినయ్‌భాస్కర్‌, మాజీ ఎంపీ సీతారాం నాయక్‌, ప్రొఫెసర్‌ దినేష్‌కుమార్‌ హాజరై అమరవీరుల స్థూపానికి ముందుగా నివాళులర్పించారు. ఈ సందర్భంగా వినయ్‌భాస్కర్‌ మాట్లాడుతూ నవంబర్‌ 29 సందర్భంగా తెలంగాణ కోసం పోరాటం చేసిన నాయకులు, కెసిఆర్‌ చేసిన దీక్ష 'తెలంగాణ వచ్చుడో-కెసిఆర్‌ చచ్చుడో'' అనే నినాదంతో తెలంగాణ సమాజం కోసం ఉద్యమం చేసి రాష్ట్రాన్ని సాధించుకున్న తెలంగాణఅన్నిరంగాల్లో ముందుకు పోతుందని, ఆనాటి ఉద్యమ జ్ఞాపకాలనునెమరు వేసుకోవడానికి ఈ దీక్షా దివాస్‌ కార్యక్రమం 11 రోజులపాటు నిర్వహించడం జరుగుతుందన్నారు. సకలజనులు, విద్యార్థులు, లాయర్లు, డాక్టర్లు అనేక సంఘాలు ఉద్యమంలో మమేకమై పని చేసాయని, అందులో కాకతీయ విశ్వవిద్యాలయం పరిధిలో ఉన్నటువంటి ఉద్యమకారుల స్థితిగతులు వారు చేసినటువంటి పాత జ్ఞాపకాల్లో నేమరు వేసుకోవడానికి ఈ కార్యక్రమాన్ని ఏర్పాటు చేశామన్నారు.
మాజీ ఎంపీ సీతారాంనాయక్‌ మాట్లాడుతూ దీక్ష దివాస్‌ ఏర్పాటు చేయడం చాలా సంతో షకరమని ఉద్యమ కారుల చరిత్రను బుక్‌ లేట్ల ద్వారా తీసుకోవడం, వారిజ్ఞాపకాలను నెమరు వేసుకోవడం ఆనందంగా ఉందని, దీనికి సహాయ సహకారమందించిన వినయ్‌ భాస్కర్‌కు ధన్యవాదాలు తెలిపారు. ఎవరికి వారే చరిత్ర రాసుకో వాలని అదేవిధంగా కేయూలోని విద్యార్థి ఉద్యమకారులు మీ చరిత్రను మీరే రాసుకోవాలని, తెలంగాణ ఉద్యమంలో విద్యార్థులు చరిత్రలో నిలిచిపోతారన్నారు.
మరొక ముఖ్య అతిథి ప్రొఫెసర్‌ దినేష్‌ కుమార్‌ మాట్లాడుతూ విద్యార్థులు స్ఫూర్తి దాతలు అన్నారు. విద్యార్థిగా ఉన్నపుడు వారిలో యువరక్తం ప్రోత్సహించినప్పుడు అనేక ఉద్యమాల ద్వారా తెలంగాణకు తోడ్పాటునందించాలన్నారు. తెలంగాణలో విద్యార్థిఉద్యమకారులకు న్యాయం జరిగేలా చర్యలు తీసుకోవాలని వినయ్‌ భాస్కర్‌కు విజ్ఞప్తి చేశారు. ఉద్యమకారులంతా కూడా సంఘర్షణలో ఉన్నారని, ఉద్యమం చేయడంతో సరిపోయిందని వారికి ఉపాధి లేదని,అలాంటి వారికి ఉపాధి కల్పించేలా చర్యలు తీసుకోవాలని అన్నారు. రాష్ట్ర దివ్యాంగుల కార్పొరేషన్‌ చైర్మన్‌ వాసుదేవరెడ్డి మాట్లాడుతూ అలనాటి ఉద్యమ జ్ఞాపకాలను నెమరు వేసుకున్నారు. రాష్ట్ర రైతురుణ విమోచన కమిషన్‌ చైర్మన్‌ నాగూర్ల వెంకటేశ్వర్లు మాట్లాడుతూ అన్ని వర్గాల ప్రజలు బాగుపడడం కోసం తెలంగాణ రాష్ట్రం సిద్ధించిందని, ఆ దిశగా అన్ని రంగాలలో ముందుకు దూసుకెళ్తుందని అన్నారు.
కుడా మాజీ చైర్మన్‌ మర్రి యాదవ రెడ్డి మాట్లాడుతూ తెలంగాణ ఉద్యమకారులకు సముచిత స్థానం కల్పించాలని, ఉద్యమ కాలంలో టీజీఏ ప్రాధాన్యత, ఉద్యమంలో టీజేఏ పాత్ర గురించి వివరించారు.అర్థనగ ప్రదర్శన,610 జీవో,కెసిఆర్‌ గారితో చేపట్టినటువంటి మహాసభలు ఇవన్నీంటిని కూడా గుర్తు చేసుకున్నారు.అలాగే విద్యార్థి ఉద్యమకారులందరు 300 మందికి శాలువా,మేమంటో ఘనంగా సన్మానించారు.
ఈ కార్యక్రమంలో కాకతీయ యూనివర్శిటీ విద్యార్థి ఉద్యమకారులు రాజేష్‌,ఫిరోజ్‌,జోరిక రమేష్‌, వీరేందర్‌, కంజర్ల మనోజ్‌, బైరపాక ప్రశాంత్‌, నాగరాజు, శరత్‌ చంద్ర, చిరంజీవి, జెడ్పీటీసీలు సైదిరెడ్డి, శ్రీరాం శ్యామ్‌, రంజిత్‌, నాగరాజు, ఇండ్ల నాగేశ్వరరావు,బండి రజిని కుమార్‌ సౌరం రఘు, దర్శన్‌ సింగ్‌,చాగంటి రమేష్‌, రాము తదితరులు పాల్గొన్నారు.
