హైదరాబాద్ : ఫ్రాన్స్‌ కేంద్రంగా కలిగిన ఏవియేషన్‌ స్కూల్‌ అయినా ఈ కోల్‌ నేషనల్‌ డీ ఏవియేషన్‌ సివిల్‌ (ఇనాక్‌)తో హిందుస్తాన్‌ ఇనిస్టిట్యూట్‌ ఆఫ్‌ టెక్నాలజీ అండ్‌ సైన్స్‌ (హిట్స్‌)తో అవగాహన ఒప్పందాన్ని కుదుర్చుకుంది. ఈ ఎంఓయుపై ఇనాక్‌ అధ్యక్షులు ఓలీవర్‌ చాన్సౌ, హిట్స్‌ ఛాన్స్‌లర్‌ ఆనంద్‌ జాకోబ్‌ వర్గీసీ సంతకాలు చేశారు. ఇందులో భాగంగా హిట్స్‌ ఏవియేషన్‌ సేఫ్టీ మేనేజ్‌మెంట్‌లో అత్యాధునిక మాస్టర్స్‌ ప్రోగ్రామ్‌ను ఇనాక్‌ భాగస్వామ్యంతో అందిస్తుందని పేర్కొంది. ఏవియేషన్‌ సేఫ్టీ మేనేజ్‌మెంట్‌/ఎంబిఎ ప్రోగ్రామ్‌లో చేరేందుకు బ్యాచులర్స్‌/మాస్టర్స్‌ డిగ్రీతో పాటుగా ఏవియేషన్‌ పరిశ్రమలో కనీసం మూడు సంవత్సరాల ప్రొఫెషనల్‌ అనుభవం అవసరం. ఈ కార్యక్రమాన్ని ప్రధానంగా ఎయిర్‌లైన్‌, ఎయిర్‌పోర్ట్‌, ఏవియేషన్‌ పరిశ్రమలో సంబంధిత ప్రొఫెషనల్స్‌ కోసం ఉద్దేశించిందని ఆ సంస్థ పేర్కొంది.
