కొత్త దర్శకులకు అవకాశం ఇస్తూ, వరుస విజయాలు అందుకుంటున్న నిర్మాణ సంస్థ యువి క్రియేషన్స్‌. దీనికి అనుబంధ సంస్థగా యూవీ కాన్సెప్ట్స్‌ బ్యానర్‌ మొదలు పెట్టారు. ఈ బ్యానర్‌లో నిర్మాణం పూర్తి చేసుకున్న సినిమా 'ఏక్‌ మినీ కథ'. అలరించే వినూత్న కాన్సెప్ట్‌తో తెరకెక్కిన ఈ చిత్ర ఫస్ట్‌ లుక్‌ ఇటీవలే విడుదలైంది. 'డజ్‌ సైజ్‌ మేటర్‌?' అంటూ పోస్టర్‌లో ఉన్న మ్యాటర్‌ ప్రేక్షకులను విశేషంగా ఆకట్టుకుంటోంది.
'పేపర్ బారు' సినిమాతో నటుడిగా మంచి గుర్తింపు సొంతం చేసుకున్న సంతోష్‌ శోభన్‌ ఈ సినిమాలో హీరోగా నటిస్తున్నారు. ఈయన లుక్‌కు అద్భుతమైన స్పందన లభించింది. ఈ మధ్యే విడుదలైన 'ఈ మాయలో..' లిరికల్‌ సాంగ్‌కి కూడా మంచి రెస్పాన్స్‌ వచ్చింది. తాజాగా ఈ చిత్ర విడుదల తేదీ ఖరారైంది. ఈనెల 30న ఈ సినిమాని విడుదల చేయనున్నట్లు దర్శక, నిర్మాతలు ప్రకటించారు. 'వెంకటాద్రి ఎక్స్‌ ప్రెస్‌', 'ఎక్స్‌ప్రెస్‌ రాజా' లాంటి విజయవంతమైన చిత్రాలను తెరకెక్కించిన దర్శకుడు మేర్లపాక గాంధీ ఈ చిత్రానికి కథ అందించారు. కార్తీక్‌ రాపోలు ఈ చిత్రానికి దర్శకుడు. రవీందర్‌ ప్రొడక్షన్‌ డిజైనర్‌ బాధ్యతలు నిర్వర్తిస్తున్నారు. గోకుల్‌ భారతి సినిమాటోగ్రఫీ అందిస్తుండగా, ప్రవీణ్‌ లక్కరాజు సంగీతం సమకూరుస్తున్నారు. సత్య ఎడిటింగ్‌ బాధ్యతలు నిర్వర్తిస్తున్న ఈ సినిమాకి సంబంధించిన మరిన్ని వివరాలను త్వరలోనే మేకర్స్‌ తెలియజేయనున్నారు. సంతోష్‌ శోభన్‌, కావ్య తప్పర్‌, బ్రహ్మాజీ, సప్తగిరి తదితరులు నటిస్తున్న ఈ చిత్రంలోని ముఖ్యతారాగణం.
