కొత్త దర్శకులకు అవకాశం ఇస్తూ వరుస విజయాలు అందుకుంటున్న నిర్మాణ సంస్థ యువి క్రియేషన్స్‌. దీనికి అనుబంధ సంస్థగా యూవీ కాన్సెప్ట్స్‌ బ్యానర్‌ మొదలు పెట్టారు. ఈ బ్యానర్‌లో నిర్మాణం పూర్తి చేసుకున్న చిత్రం 'ఏక్‌ మినీ కథ'. ఈ చిత్ర ఫస్ట్‌లుక్‌ ఈ మధ్యే విడుదలైంది. 'డజ్‌ సైజ్‌ మేటర్స్‌' అంటూ పోస్టర్‌లో ఉన్న మ్యాటర్‌ ప్రేక్షకులను విశేషంగా ఆకట్టుకుంది.
''పేపర్ బాయ్‌' సినిమాతో నటుడిగా గుర్తింపు సంపాదించుకున్న సంతోష్‌ శోభన్‌ ఈ సినిమాలో హీరోగా నటిస్తున్నారు. ఈయన లుక్‌కు అద్భుతమైన స్పందన లభించింది. ఈ మధ్యే 'ఈ మాయలో..' లిరికల్‌ సాంగ్‌ విడుదలైంది. దీనికి కూడా మంచి రెస్పాన్స్‌ వచ్చింది. తాజాగా ఈ చిత్ర ఆడియో నుంచి మరో పాటను విడుదల చేశారు. 'సామిరంగా..' అంటూ సాగే ఈ పాట విడుదలైన అతి కొద్ది సమయంలోనే సోషల్‌ మీడియాలో విశేష స్పందన అందుకుంటూ చాట్‌ బస్టర్‌గా నిలిచింది. 'వెంకటాద్రి ఎక్స్‌ప్రెస్‌', 'ఎక్స్‌ప్రెస్‌ రాజా' లాంటి విజయవంతమైన చిత్రాలను తెరకెక్కించిన దర్శకుడు మేర్లపాక గాంధీ ఈ చిత్రానికి కథ అందించారు. కార్తీక్‌ రాపోలు ఈ చిత్రాన్ని తెరకెక్కిస్తున్నారు. రవీందర్‌ ప్రొడక్షన్‌ డిజైనర్‌ బాధ్యతలు నిర్వర్తిస్తున్నారు. గోకుల్‌ భారతి సినిమాటోగ్రఫీ అందిస్తుండగా, ప్రవీణ్‌ లక్కరాజు సంగీతం సమకూరుస్తున్నారు. సత్య ఎడిటింగ్‌ బాధ్యతలు నిర్వర్తిస్తున్న ఈ సినిమాకి సంబంధించిన మరిన్ని వివరాలు త్వరలోనే తెలియనున్నాయి' అని చిత్ర బృందం తెలిపింది.
