బ్రహ్మానందం, సముద్రఖని, స్వాతి రెడ్డి, శివాత్మిక రాజశేఖర్‌, యువ హీరో రాహుల్‌ విజయ్‌, 'మత్తు వదలరా' ఫేమ్‌ నరేష్‌ అగస్త్య ప్రధాన తారాగణంగా నటిస్తున్న చిత్రం 'పంచతంత్రం'. టికెట్‌ ఫ్యాక్టరీ, ఎస్‌ ఒరిజినల్స్‌ సంస్థలు సంయుక్తంగా నిర్మిస్తున్నాయి.
హర్ష పులిపాక రచన, దర్శకత్వంలో రూపొందుతున్న ఈ చిత్రానికి అఖిలేష్‌ వర్ధన్‌, సజన్‌ ఎరబోలు నిర్మాతలు. సోమవారం సముద్రఖని బర్త్‌డే సందర్భంగా ఈ సినిమాలో ఆయన ఫస్ట్‌లుక్‌ని విడుదల చేశారు. రామనాథం పాత్రలో సముద్రఖని నటిస్తున్నట్టు మేకర్స్‌ అధికారికంగా తెలిపారు.
ఈ సందర్భంగా నిర్మాతలు సజన్‌ ఎరబోలు, అఖిలేష్‌ వర్ధన్‌ మాట్లాడుతూ, 'సముద్రఖనిగారికి జన్మదిన శుభాకాంక్షలు. గొప్ప నటుడు, వ్యక్తి మా సినిమాలో నటించడం నాకు ఎంతో సంతోషంగా ఉంది. ఓ నటుడిగా ఆయనలో కొత్త కోణాన్ని ఈ సినిమాలో చూస్తారు. సినిమా చిత్రీకరణ చాలా వరకూ పూర్తయింది. మరో పది రోజుల చిత్రీకరణ బ్యాలెన్స్‌ ఉంది. పోస్ట్‌ ప్రొడక్షన్‌ వర్క్‌ స్టార్ట్‌ చేశాం' అని చెప్పారు.
దర్శకుడు హర్ష పులిపాక మాట్లాడుతూ, 'పంచేంద్రియాలు చుట్టూ అల్లుకున్న కథతో సినిమా తెరకెక్కిస్తున్నాం. ఇందులో సముద్రఖనిగారు రామనాథం అనే రిటైర్డ్‌ బ్యాంక్‌ మేనేజర్‌ క్యారెక్టర్‌ చేస్తున్నారు. ఈ ఏడాది 'క్రాక్‌', అంతకు ముందు 'అల వైకుంఠపురములో' సినిమాల్లో ఆయన పవర్‌ఫుల్‌ విలన్‌గా నటించి మెప్పించారు. మా సినిమాలో మాత్రం ఆయన హీరోగా కనిపిస్తారు. 60 ఏళ్ళ రామనాథం పాత్ర సినిమా చూస్తున్న ప్రతి యంగ్‌స్టర్‌కి తన తండ్రిని గుర్తు చేసేలా ఉంటుంది' అని తెలిపారు.
ఈ చిత్రానికి ఎడిటర్‌: గ్యారీ బీహెచ్‌, సినిమాటోగ్రఫీ: రాజ్‌ కె. నల్లి, ప్రొడక్షన్‌ కంట్రోలర్‌: సాయి బాబు వాసిరెడ్డి, లైన్‌ ప్రొడ్యూసర్‌: సునీత్‌ పడోల్కర్‌, ఎగ్జిక్యూటివ్‌ ప్రొడ్యూసర్‌: భువన్‌ సాలూరు, క్రియేటివ్‌ ప్రొడ్యూసర్‌: ఉషారెడ్డి వవ్వేటి, మాటలు: హర్ష పులిపాక, 'కలర్‌ ఫొటో' ఫేమ్‌ సందీప్‌ రాజ్‌, పాటలు: కిట్టు విస్సాప్రగడ, సంగీతం: ప్రశాంత్‌ ఆర్‌. విహారి, సహ నిర్మాతలు: రమేష్‌ వీరగంధం, రవళి కలంగి, నిర్మాతలు: అఖిలేష్‌ వర్ధన్‌, సజన్‌ ఎరబోలు, రైటర్‌ - డైరెక్టర్‌: హర్ష పులిపాక.
