- 200 మంది సినీ కార్మికులకు నిత్యావసరాలు
కరోనా సెకండ్‌ వేవ్‌ ధాటికి అతలాకుతలమైపోతున్న సినీ కార్మికులకు ఆదుకునేందుకు 'ఫైటర్‌శివ' చిత్ర బృందం పెద్ద మనసు చేసుకుంది.
ఈ చిత్ర ఫస్ట్‌ లుక్‌ పోస్టర్‌ లాంచ్‌ సందర్భంగా 200 మంది సినీ కార్మికులకు నిత్యావసర వస్తువులను చిత్ర బృందం పంపిణీ చేసింది. మణికాంత్‌, శీతల్‌ భట్‌ హీరో, హీరోయిన్‌గా నటిస్తున్న యాక్షన్‌ ఎంటర్‌టైనర్‌ 'ఫైటర్‌ శివ'. ఈ చిత్రంలో హీరో సునీల్‌ సిబిఐ ఆఫీసర్‌గా కీలక పాత్రలో నటిస్తున్నారు. కౌండిన్య ప్రొడక్షన్‌ బ్యానర్‌ పై ప్రభాస్‌ నిమ్మల దర్శకత్వంలో జి.నరసింహ గౌడ్‌ ఈ చిత్రాన్ని నిర్మిస్తున్నారు. ఈ సందర్భంగా దర్శకుడు ప్రభాస్‌ నిమ్మల మాట్లాడుతూ,'రెండు షెడ్యూల్స్‌ కంప్లీట్‌ చేశాం. చివరి షెడ్యూల్‌ ప్లాన్‌ చేస్తున్నాం. సినిమా ఇప్పటివరకు బాగా వచ్చింది. ఫస్ట్‌లుక్‌ పోస్టర్‌ను భారీగా రిలీజ్‌ చేయాలని ప్లాన్‌ చేశాం. కానీ లాక్‌డౌన్‌ వల్ల అది కుదరలేదు. కరోనా వల్ల ఇబ్బంది పడుతున్న సినీ కార్మికులకు పది రోజులకు సరిపడా రేషన్‌ని పంపిణీ చేయాలని చిత్ర యూనిట్‌ సంకల్పించింది. కో ఆర్డినేటర్‌ కష్ణను సంప్రదించి ఇబ్బంది పడుతున్న కళాకారులను పిలిపించాం. వారి సమక్షంలోనే ఈ సినిమా పోస్టర్‌ని లాంచ్‌ చేసి, 200 మంది కళాకారులకు నిత్యావసర వస్తువులను అందజేశాం. ఇలాంటి మహత్తర కార్యక్రమానికి ముందుకు వచ్చిన ప్రొడ్యూసర్‌, ఫైనాన్సర్‌ చింతపల్లి రామారావుకి ప్రత్యేక ధన్యవాదాలు' అని చెప్పారు.
'లాక్‌డౌన్‌ తర్వాత మూడో షెడ్యూల్‌ చేస్తాం. బడ్జెట్‌ విషయంలో ఎక్కడా కాంప్రమైజ్‌ కాకుండా ఈ చిత్రాన్ని నిర్మిస్తున్నాం. హీరో, హీరోయిన్‌ చక్కగా నటించారు. అనుకున్న దానికంటే దర్శకుడు ఎంతో అద్భుతంగా ఈ సినిమాని తెరకెక్కిస్తున్నారు. ఈ సినిమా ఫస్ట్‌లుక్‌ లాంచ్‌ సందర్భంగా ఇబ్బందుల్లో ఉన్న కళాకారులకు నిత్యావసరాలను అందజేయటం చాలా సంతోషంగా ఉంది' అని నిర్మాత నరసింహ గౌడ్‌ అన్నారు. ఈ చిత్రానికి ఫైట్స్‌ : నభ, కెమెరా : సంజరు లోకనాథ్‌, మాటలు : బయ్యారపు రవి, మ్యూజిక్ : మణిశర్మ.
