మోహన్‌బాబు కథానాయకుడిగా శ్రీ లక్ష్మీప్రసన్న పిక్చర్స్‌, 24 ఫ్రేమ్స్‌ ఫ్యాక్టరీ పతాకంపై విష్ణు మంచు నిర్మిస్తున్న చిత్రం 'సన్‌ ఆఫ్‌ ఇండియా'. డైమండ్‌ రత్నబాబు దర్శకత్వంలో రూపొందుతున్న ఈ చిత్ర టీజర్‌ని శుక్రవారం హీరో సూర్య సోషల్‌ మీడియా ద్వారా విడుదల చేశారు. 'కలెక్షన్‌ కింగ్‌ మోహన్‌బాబు సార్‌ అంటే నాకెంతో గౌరవం. ఈ చిత్ర టీజర్‌ని రిలీజ్‌ చేసినందుకు చాలా ఆనందంగా ఉంది' అని సూర్య చెప్పారు. ఈ టీజర్‌ని సూర్య రిలీజ్‌ చేయటం ఓ విశేషమైతే, చిరంజీవి వాయిస్‌ ఓవర్‌తో ఈ టీజర్‌ ఉండటం మరో విశేషం.
'మన అంచనాలకు అందని ఒక వ్యక్తిని ఇప్పుడు మీకు పరిచయం చేయబోతున్నాను.. తన రూటే సెపరేటు.. తను ఎప్పుడు ఎక్కడ ఉంటాడో, ఎప్పుడు ఏ వేషంలో ఉంటాడో ఆ దేవుడికే ఎరుక. తన బ్రెయిన్లో న్యూరాన్స్‌ ఎప్పుడు ఎలాంటి థాట్‌ ని ట్రిగ్గర్‌ చేస్తుందో ఏ బ్రెయిన్‌ స్పెషలిస్టూ చెప్పలేడు' అని చిరంజీవి అంటే, 'నేను చీకట్లో ఉండే వెలుతుర్ని, వెలుతురులో ఉండే చీకటిని'అని మోహన్‌ బాబు సమాధానమివ్వడంతో, 'వెరీ ఇంట్రస్టింగ్‌' అని చిరంజీవి అన్నదానికి 'నేను కసక్‌ అంటే మీరందరూ ఫసక్‌' అని మోహన్‌ బాబు అంటారు. ఈ సినిమాలో మోహన్‌ బాబు పాత్ర ఎంత పవర్‌ఫుల్‌గా ఉంటుందో వీరిద్దరి డైలాగ్స్‌ చెప్పకనే చెబుతున్నాయి.
ఈ సందర్భంగా మోహన్‌ బాబు మాట్లాడుతూ, 'ఈ చిత్రానికి ప్రారంభంలో వాయిస్‌ ఓవర్‌ అవసరమైంది. విష్ణు వెంటనే చిరంజీవి అంకుల్‌ వాయిస్‌ బాగుంటుందన్నాడు. చిరంజీవికి ఫోన్‌ చేసి అడిగాను. ఎన్నిరోజుల్లో కావాలి? అన్నాడు. పది రోజుల్లో ఎప్పుడైనా ఓకే అన్నాను. ఆ వాయిస్‌ ఓవర్‌ మ్యాటర్‌ని తనకి పంపమంటే పంపాను. 'ఆచార్య' షూటింగ్‌లో బిజీగా ఉన్న చిరంజీవి నేను అడిగిన మూడు రోజుల్లోనే, నాకు చెప్పకుండా.. తనే థియేటర్‌ బుక్‌ చేసి, తనే డబ్బింగ్‌ చెప్పి పంపాలనుకున్నాడు. ఆ సంగతి నాకు తెలిసి, డబ్బింగ్‌ థియేటర్‌కి విష్ణుని పంపాను. విష్ణుని చూడగానే చిరంజీవి నవ్వుతూ నిన్ను ఎవరు రమ్మన్నారు. డబ్‌ చేసి మీ నాన్నకి సర్‌ప్రైజ్‌ ఇద్దామనుకున్నాను అని చెప్పాడు. అంత గొప్ప మనసు ఎవరికి ఉంటుంది?, నేను అడగ్గానే ఇంత గొప్పగా స్పందించిన చిరంజీవి తీరుకి, అతని సహదయతకు నా హదయపూర్వక ధన్యవాదాలు. అలాగే టీజర్‌ని ఈనెల 4న నీ చేతుల మీదుగా రిలీజ్‌ చేద్దామనుకుంటున్నాను అని సూర్యకి చెప్పాను. వెంటనే పెద్దవారు మీరెందుకు నాకు చెప్తారు. నేను మీ ఫ్యామిలీ మెంబర్‌ని. నేను విష్ణుతో మాట్లాడి, మేం ప్లాన్‌ చేసుకుంటాం. మీరు చెప్పిన టైంకి రిలీజ్‌ అవుతుందని చెప్పి మరీ రిలీజ్‌ చేశాడు. సూర్యకి నా మీద ఉన్న ప్రేమకి ధన్యవాదాలు. ఈ టీజర్‌కి అంచనాలకు మించి ప్రేక్షకులు, అభిమానులు స్పందించినందుకు హదయపూర్వక ధన్యవాదాలు.. త్వరలో ఈ చిత్రానికి సంబంధించి మరిన్ని అప్‌డేట్స్‌తో మీముందుకొస్తాం' అని చెప్పారు.
