కార్తికేయ గుమ్మకొండ కథానాయకుడిగా శ్రీ చిత్ర మూవీ మేకర్స్‌ పతాకంపై ఓ సినిమా రూపొందుతున్న విషయం విదితమే. ఆదిరెడ్డి.టి సమర్పణలో 88 రామారెడ్డి ఈ చిత్రాన్ని నిర్మిస్తున్నారు. అగ్ర దర్శకుడు వి.వి.వినాయక్‌ శిష్యుడు శ్రీ సరిపల్లి దర్శకుడిగా ఈ చిత్రంతో పరిచయం అవుతున్నారు. కార్తికేయ 7వ చిత్రంగా నటిస్తున్న దీనికి 'రాజావిక్రమార్క' అనే టైటిల్‌ని ఖరారు చేశారు. అలాగే సినిమాలో హీరో ఫస్ట్‌లుక్‌ను విడుదల చేశారు. టైటిల్‌ ప్రకటనతో పాటు సినిమా ఫస్ట్‌ లుక్‌ పోస్టర్‌ను 'అర్జున్ రెడ్డి', 'కబీర్‌ సింగ్‌' చిత్రాల దర్శకుడు సందీప్‌ రెడ్డి వంగా ఆదివారం సోషల్‌ మీడియా వేదికగా రిలీజ్‌ చేశారు. మెగాస్టార్‌ నటించిన బ్లాక్‌బస్టర్‌ సినిమా 'రాజా విక్రమార్క' టైటిల్‌తో ఈ సినిమా వస్తుండటంతో సర్వత్రా ఆసక్తి నెలకొంది. ఈ సందర్భంగా నిర్మాత 88 రామారెడ్డి మాట్లాడుతూ, 'టైటిల్‌తో పాటు ఫస్ట్‌ లుక్‌ పోస్టర్‌ రిలీజ్‌ చేసిన దర్శకులు సందీప్‌ రెడ్డి వంగాకి కతజ్ఞతలు. ఇదొక యాక్షన్‌ ఎంటర్‌టైనర్‌ కార్తికేయ నటన, పాత్ర చిత్రణ సినిమాకి ప్రత్యేక ఆకర్షణగా నిలుస్తుంది. కథకు, హీరోకు పక్కా యాప్ట్‌ టైటిల్‌ 'రాజావిక్రమార్క'. టైటిల్‌తో పాటు ఫస్ట్‌లుక్‌కు ప్రేక్షకుల నుండి అద్భుత స్పందన లభిస్తోంది. ముఖ్యంగా కార్తికేయ లుక్‌ అందరికీ నచ్చింది. సినిమా కోసం ఆయన చాలా కష్టపడ్డారు. అన్ని వర్గాల ప్రేక్షకులను అలరించే చిత్రమిది. చిత్రీకరణ చాలావరకూ పూర్తయింది. లాక్‌డౌన్‌ ఆంక్షలు పూర్తిగా సడలించిన తర్వాత మిగతా భాగం పూర్తి చేసి, ఆ తర్వాత విడుదల వివరాలు వెల్లడిస్తాం' అని తెలిపారు. 'సినిమాలో కొత్తగా ఎన్‌.ఐ.ఏ (నేషనల్‌ ఇన్వెస్టిగేషన్‌ ఏజెన్సీ)లో జాయిన్‌ అయిన అధికారిగా హీరో కార్తికేయ కనిపిస్తారు. ఈ పాత్రలో ఆయన ఒదిగిపోయి నటించారు. యాక్షన్‌ సన్నివేశాలను స్పెషల్‌గా డిజైన్‌ చేశాం. అవి ప్రేక్షకుల్ని థ్రిల్‌ చేస్తాయి. సీనియర్‌ తమిళ నటులు రవిచంద్రన్‌ గారి మనవరాలు తాన్యా రవిచంద్రన్‌ని ఈ సినిమాతో కథానాయికగా తెలుగు పరిశ్రమకు పరిచయం చేస్తున్నాం. హీరో, హీరోయిన్ల మధ్య సన్నివేశాలు క్యూట్‌గా ఉంటాయి. యువ సంగీత దర్శకుడు ప్రశాంత్‌ ఆర్‌. విహారి మంచి బాణీలు అందించారు. త్వరలో మరిన్ని వివరాలు వెల్లడిస్తాం' అని దర్శకుడు శ్రీ సరిపల్లి చెప్పారు. సాయికుమార్‌, తనికెళ్ళ భరణి, పశుపతి, హర్షవర్ధన్‌, సూర్య, జెమిని సురేష్‌, జబర్దస్త్‌ నవీన్‌ తదితరులు ఈ చిత్రంలో ప్రధాన పాత్రల్లో నటిస్తున్నారు.
