వరుణ్‌తేజ్‌ బాక్సర్‌గా నటిస్తున్న తాజా చిత్రం 'గని'. అల్లు అరవింద్‌ సమర్పణలో రెనసాన్స్‌ ఫిలింస్‌, అల్లు బాబీ కంపెనీ పతాకాలపై సిద్ధు ముద్ద, అల్లు బాబీ ఈ చిత్రాన్ని నిర్మిస్తున్నారు. కిరణ్‌ కొర్రపాటి దర్శకుడు. ప్రస్తుతం ఈ సినిమా ఫైనల్‌ షెడ్యూల్‌ చిత్రీకరణ శరవేగంగా జరుగుతోంది. పోస్ట్‌ ప్రొడక్షన్‌ సహా అన్ని కార్యక్రమాలను పూర్తి చేసి దీపావళి కానుకగా ఈచిత్రాన్ని విడుదల చేయడానికి నిర్మాతలు సన్నాహాలు చేస్తున్నారు.
ఈ సందర్భంగా నిర్మాతలు మాట్లాడుతూ, 'కోవిడ్‌ సెకండ్‌ వేవ్‌ తర్వాత హైదరాబాద్‌లో భారీ సెట్‌ వేసి ఫైనల్‌ షెడ్యూల్‌ను చిత్రీకరిస్తున్నాం. ఈ సినిమా కోసం వరుణ్‌తేజ్‌ తన లుక్‌ను పూర్తిగా మార్చుకున్నారు. రీసెంట్‌గా ఆయన లుక్‌, ఎక్సర్‌సైజ్‌ ప్రోమోలకు ఫ్యాన్స్‌, ఆడియెన్స్‌ నుంచి చాలా మంచి రెస్పాన్స్‌ వచ్చింది. బాక్సింగ్‌ బ్యాక్‌డ్రాప్‌లో రూపొందుతున్న ఈ చిత్రానికి హాలీవుడ్‌ 'టైటాన్స్‌', బాలీవుడ్‌ 'సుల్తాన్‌' వంటి చిత్రాలకు యాక్షన్‌ సన్నివేశాలను డిజైన్‌ చేసిన హాలీవుడ్‌ స్టంట్‌ మాస్టర్స్‌ లార్నెల్‌ స్టోవల్‌, వ్లాడ్‌ రింబర్గ్‌ యాక్షన్‌ సన్నివేశాలను డిజైన్‌ చేస్తున్నారు.
తెలుగు ఆడియెన్స్‌కు ఓ సరికొత్త ఎక్స్‌పీరియెన్స్‌ను ఇచ్చేలా సినిమాని నిర్మిస్తున్నాం. ఈ ఏడాది దీపావళి కానుకగా మా సినిమాని భారీ రేంజ్‌లో విడుదల చేస్తాం' అని చెప్పారు. సయీ మంజ్రేకర్‌ కథానాయికగా నటిస్తున్న ఈ చిత్రంలో ఉపేంద్ర, సునీల్‌ శెట్టి, నవీన చంద్ర కీలక పాత్రలు పోషిస్తున్నారు.
