నాగార్జున, ప్రవీణ్‌ సత్తారు కాంబినేషన్‌లో ఓ సినిమా రూపొందుతున్న విషయం తెలిసిందే. శ్రీ వెంకటేశ్వర ఎల్‌ఎల్‌పి, నార్త్‌స్టార్‌ ఎంటర్‌టైన్‌మెంట్‌ పతాకాలపై నారాయణ్‌ దాస్‌ కె.నారంగ్‌, పుస్కూర్‌ రామ్మోహన్‌ రావు, శరత్‌ మరార్‌ ఈ చిత్రాన్ని నిర్మిస్తున్నారు.
శుక్రవారం నిర్మాత సునీల్‌ నారంగ్‌ పుట్టినరోజు. ఈ సందర్భంగా చిత్ర యూనిట్‌ ఈ చిత్ర ప్రీ లుక్‌ పోస్టర్‌ను విడుదల చేసింది. వర్షం పడుతున్న బ్యాక్‌డ్రాప్‌లో రక్తంతో ఉన్న ఓ పొడవాటి కత్తి పట్టుకుని ఉన్న నాగార్జున ప్రీ లుక్‌ అందరిలోనూ ఆసక్తి రేకెత్తిస్తోంది. ఆ ఆసక్తిని మరింత రెట్టింపు చేసేందుకు ఈనెల 29న నాగార్జున పుట్టినరోజు సందర్భంగా ఓ ముఖ్యమైన అప్‌డేట్‌ ఇచ్చేందుకు చిత్ర బృందం సన్నాహాలు చేస్తోంది.
'ప్రీ లుక్‌లో నాగ్‌ యాక్షన్‌ స్టైల్‌ చూసి ఆయన అభిమానులు ఫుల్‌ ఖుషీ అవుతున్నారు. యాక్షన్‌ చిత్రాలను ఇష్టపడే ప్రేక్షకులకు సరికొత్త ఎక్స్‌పీరియెన్స్‌ను అందించబోయే చిత్రంగా దీన్ని హై యాక్షన్‌ సన్నివేశాలతో భారీ స్థాయిలో రూపొందిస్తున్నారు. ఇందులో నాగార్జున పవర్‌పుల్‌ పాత్రలో నటిస్తున్నారు. దర్శకుడు ప్రవీణ్‌ సత్తారు ఈ సినిమా కోసం అద్భుతమైన స్క్రిప్ట్‌ రెడీ చేశారు. హై బడ్జెట్‌లో, మెస్మరైజ్‌ చేసే విజువల్స్‌తో ఈ సినిమాని ఎక్కడా కాంప్రమైజ్‌ కాకుండా నిర్మిస్తున్నారు. ప్రస్తుతం ఈ సినిమా షూటింగ్‌ హైదరాబాద్‌లో జరుగుతోంది. కాజల్‌ అగర్వాల్‌ హీరోయిన్‌గా నటిస్తున్న ఈ చిత్రంలో గుల్‌ పనాంగ్‌, అనైక సురేంద్రన్‌ కీలక పాత్రల్లో కనిపించనున్నారు' అని చిత్ర యూనిట్‌ తెలిపింది. ఈ చిత్రానికి సినిమాటోగ్రఫీ: ముఖేశ్‌.జి, యాక్షన్‌: రాబిన్‌ సుబ్బు, నభా మాస్టర్‌, ఆర్ట్‌ డైరెక్టర్‌: బ్రహ్మ కడలి.
