దర్శకేంద్రుడు కె.రాఘవేంద్రరావు తొలిసారి నటిస్తూ, ఆయన దర్శకత్వ పర్యవేక్షణలో రూపొందుతున్న చిత్రం 'పెళ్లి సందడి'. ఈ సినిమాతో గౌరి రోణంకి దర్శకురాలిగా పరిచయం అవుతున్నారు. ఆర్కా మీడియా వర్క్స్‌, ఆర్‌.కె ఫిలిం అసోసియేట్స్‌ బ్యానర్స్‌పై కె.కష్ణ మోహన్‌రావు సమర్పణలో మాధవి కోవెలమూడి, శోభు యార్లగడ్డ, ప్రసాద్‌ దేవినేని ఈ చిత్రాన్ని నిర్మిస్తున్నారు. దర్శకేంద్రుడు తెరకెక్కించిన 'పెళ్లిసందడి'లో శ్రీకాంత్‌ హీరోగా నటిస్తే, దర్శకేంద్రుడి శిష్యురాలు గౌరి రోణంకి డైరెక్ట్‌ చేస్తున్న ఈ 'పెళ్లిసందడి'లో శ్రీకాంత్‌ తనయుడు రోషన్‌ హీరోగా నటించడం విశేషం. శ్రీలీల కథానాయిక. ఈ చిత్ర టీజర్‌ను అగ్ర కథానాయకుడు నాగార్జున విడుదల చేసి, సినిమా చాలా పెద్ద హిట్‌ కావాలంటూ చిత్ర యూనిట్‌కు అభినందనలు తెలిపారు.
'దర్శకేంద్రుడి సినిమాల్లోని క్యారెక్టరైజేషన్లు, కమర్షియల్‌ హంగులు గురించి ప్రత్యేకంగా చెప్పక్కర్లేదు. అలాగే ఆయన శిష్యురాలు దర్శకత్వం వహించిన ఈ చిత్రంలోనూ ఇలాంటి వాటికి కొదవే లేదని టీజర్‌ చూస్తే అర్థమవుతుంది. హీరో రోషన్‌ స్టైలిష్‌ లుక్‌తో క్యారెక్టరైజేషన్‌ ఎలా ఉండబోతుందనే విషయాన్ని సింపుల్‌గా చెప్పారు. అలాగే లంగా ఓణిలో అచ్చ తెలుగమ్మాయిగా హీరోయిన్‌ శ్రీలీలను అందంగా ప్రెజెంట్‌ చేశారు. హీరో, హీరోయిన్‌ల మధ్య రొమాంటిక్‌ సన్నివేశాలు, 'సహస్త్రకు పెళ్లి నాతోనా లేక నువ్వు తెచ్చి తొట్టి గ్యాంగ్‌ లీడర్‌తోనా' అని హీరో రోషన్‌, హీరోయిన్‌ తండ్రి ప్రకాశ్‌రాజ్‌తో ఛాలెంజ్‌ చేసే సీన్‌తోపాటు యాక్షన్‌ సీక్వెన్స్‌, పెళ్లిలో హడావుడి, కమర్షియల్‌ సాంగ్‌, ఎమోషనల్‌ సన్నివేశాలు.. ఒక్కమాటలో చెప్పాలంటే పెళ్లి భోజనం ఎంత చక్కగా ఉంటుందో అంతే చక్కగా 'పెళ్ళిసందడి' ఉంటుందనేలా టీజర్‌ ఉంది' అని చిత్ర బృందం తెలిపింది.
దర్శకురాలు గౌరి రోణంకి మాట్లాడుతూ,'ఈ సినిమా నుంచి విడుదలైన రాఘవేంద్రరావుగారి ప్రోమో, హీరో, హీరోయిన్‌ ప్రోమోలు, సాంగ్స్‌ అన్నింటికీ ప్రేక్షకుల నుంచి అద్భుతమైన రెస్పాన్స్‌ వచ్చింది. తాజాగా నాగార్జునగారు రిలీజ్‌ చేసిన టీజర్‌కి సర్వత్రా ప్రశంసలు లభిస్తున్నాయి. ప్రస్తుతం నిర్మాణానంతర కార్యక్రమాలు శరవేగంగా జరుగుతున్నాయి. త్వరలోనే సినిమా విడుదల తేదీని తెలియజేస్తాం' అని తెలిపారు.
ప్రకాష్‌రాజ్‌, రాజేంద్ర ప్రసాద్‌, రావు రమేష్‌, తనికెళ్ల భరణి, పోసాని కష్ణ మురళి, వెన్నెల కిషోర్‌, సత్యంరాజేష్‌, రాజీవ్‌ కనకాల, శ్రీనివాస్‌ రెడ్డి, శకలక శంకర్‌, అన్నపూర్ణ, జాన్సి, ప్రగతి, హేమ, కౌముది, భద్రం, కిరీటి తదితరులు నటిస్తున్న ఈ చిత్రానికి సంగీతం: ఎం.ఎం.కీరవాణి, సాహిత్యం: శివశక్తి దత్త, చంద్రబోస్‌, సినిమాటోగ్రఫీ: సునీల్‌ కుమార్‌ నామ, ఎడిటర్‌: తమ్మిరాజు, ఆర్ట్‌: కిరణ్‌ కుమార్‌ మన్నె, మాటలు: శ్రీధర్‌ సీపాన, ఫైట్స్‌: వెంకట్‌, కొరియోగ్రఫి: శేఖర్‌ వీజే, ఎగ్జిక్యూటివ్‌ ప్రొడ్యూసర్‌: సాయిబాబా కోవెలమూడి.
