సితార ఎంటర్‌ టైన్మెంట్స్‌, ఫార్చ్యూన్‌ 4 సినిమాస్‌ సంయుక్తంగా ఓ చిత్రాన్ని నిర్మించేందుకు రంగం సిద్ధం చేశాయి. ఇందులో హీరోగా నవీన్‌ పోలిశెట్టి నటిస్తున్నారు. ఫార్చ్యూన్‌ 4 సినిమాస్‌ బ్యానర్‌కి ఇది తొలి చిత్రం కాగా, సితార ఎంటర్‌టైన్మెంట్స్‌కి 15 వ చిత్రం కావడం విశేషం. నవీన్‌ పోలిశెట్టి నయా చిత్రం గురించి బుధవారం చిత్ర బృందం అధికారికంగా ప్రకటిస్తూ ఓ పోస్టర్‌ని రిలీజ్‌ చేశారు.
    నవీన్‌ పోలిశెట్టి..ఈ తరం వినోదానికి నిఖార్సైన చిరునామా. ఆయన హీరోగా నటిస్తున్న ఈ చిత్రంతో కళ్యాణ్‌ శంకర్‌ దర్శకుడిగా పరిచయం అవుతున్నారు. ప్రేక్షకులుగా మీరు మరింత సరదాగా నవ్వుకోవడానికి సమాయుత్త మవ్వండి, మేము వినోదాన్ని పంచడానికి సిద్ధమవుతున్నాం అంటూ పోస్టర్‌లో ప్రకటించారు. వినోదమే పరమావధిగా నవీన్‌ పోలిశెట్టి సరికొత్త అవతారం ఈ చిత్రం స్వంతం. హీరోగా ఆయనకిది మూడవ చిత్రం. చిత్ర పూర్వ నిర్మాణ పనులు శరవేగంగా జరుగుతున్నాయి. పి.డి.వి. ప్రసాద్‌ సమర్పణలో రూపొందనున్న ఈ చిత్రానికి సంబంధించిన మరిన్ని వివరాలను, విశేషాలను త్వరలోనే తెలియజేస్తామని నిర్మాతలు సూర్య దేవర నాగవంశీ, శ్రీమతి సాయి సౌజన్య తెలిపారు.