నటుడు, నిర్మాత బండ్ల గణేష్‌ కథానాయకుడిగా పరిచయమవుతున్న చిత్రానికి 'డేగల బాబ్జీ' అనే టైటిల్‌ ఖరారు చేశారు. ఈ సందర్భంగా టైటిల్‌ పోస్టర్‌ను డైరెక్టర్‌ హరీష్‌ శంకర్‌ రిలీజ్‌ చేశారు. వెంకట్‌ చంద్రను దర్శకుడిగా పరిచయం చేస్తూ, రిషి అగస్త్య సమర్పణలో యష్‌ రిషి ఫిలిమ్స్‌ పతాకంపై ఈ సినిమాను స్వాతి చంద్ర నిర్మిస్తున్నారు. ఈ నెల ప్రారంభంలో చిత్రీకరణ ప్రారంభమైంది. శరవేగంగా చిత్రీకరణ జరుపుతున్నారు.
టైటిల్‌ ఎనౌన్స్‌ చేసిన సందర్భంగా దర్శక, నిర్మాతలు మాట్లాడుతూ, 'తమిళ హిట్‌ చిత్రం 'ఒత్తు సెరుప్పు సైజ్‌ 7'కి ఈ సినిమా రీమేక్‌. తమిళంలో ఆర్‌.పార్తిబన్‌ పోషించిన పాత్రను తెలుగులో బండ్ల గణేష్‌ చేస్తున్నారు. ఈ పాత్ర కోసం బండ్ల గణేష్‌ పత్యేకంగా మేకోవర్‌ అయ్యారు. విడుదల చేసిన టైటిల్‌ పోస్టర్‌ ప్రేక్షకులను విశేషంగా ఆకట్టుకుంటోంది. కేవలం కనులు మాత్రమే కనిపించేలా, ముఖానికి కండువాతో కవర్ చేసిన బండ్ల గణేష్‌ కనిపిస్తుంటే, ఆయన కన్నుపై కత్తిగాటు, దానిపై వేసిన కుట్లు, గాయం నుండి కారుతున్న రక్తపు బొట్టు సినిమాపై అందరిలోనూ ఆసక్తి పెంచుతోంది. అలాగే 'డేగల బాబ్జీ' టైటిల్‌కూ మంచి స్పందన లభిస్తోంది. అన్ని వర్గాలనూ మెప్పించే చిత్రమిది. ప్రస్తుతం చిత్రీకరణను ఏకధాటిగా నిర్వహిస్తున్నాం. త్వరలో మరిన్ని వివరాలు వెల్లడిస్తాం' అని చెప్పారు. ఈ చిత్రానికి ఈ చిత్రానికి కళా దర్శకత్వం: గాంధీ, ఛాయాగ్రహణం: అరుణ్‌ దేవినేని, మాటలు: మరుధూరి రాజా, సంగీతం: లైనస్‌ మధిరి, నిర్మాణ - పర్యవేక్షణ : ముప్పా అంకమ్మరావు, దర్శకత్వం: వెంకట్‌ చంద్ర, నిర్మాణం: స్వాతి చంద్ర.
