వీబీ ఎంటర్‌టైన్మెంట్స్‌ సంస్థ 2014 నుండి తెలుగు ఫిల్మ్, టీవీ డైరెక్టరీని ప్రచురించడమే కాకుండా బుల్లితెర, వెండితెర అవార్డులను కూడా అందిస్తోంది. వీబీ ఎంటర్‌టైన్మెంట్స్‌ అధినేత విష్ణు బొప్పన ప్రతి ఏడాది మాదిరిగానే ఈ ఏడాదికి సంబంధించిన సినిమా తారల డైరీని రూపొందించారు. సినీప్రముఖుల సమక్షంలో ఈ డైరీ ఆవిష్కరణ కార్యక్రమం శనివారం ప్రసాద్‌ ల్యాబ్‌లో ఘనంగా జరిగింది. 'మా' అధ్యక్షులు వి.కె.నరేష్‌ డైరీని లాంచ్‌ చేసి, నటుడు శివ బాలాజీకి, విష్ణు బొప్పనకి అందజేశారు. అలాగే త్వరలో జరగబోయే వీబీ ఎంటర్‌టైన్మెంట్స్‌ బుల్లితెర అవార్డుల బిగ్‌ పోస్టర్‌ని కూడా ఆవిష్కరించారు. ఎప్పటిలాగే మూవీ ఆర్టిస్ట్‌ అసోసియేషన్‌ (మా)లోని పేద కళాకారులకు పదివేల రూపాయలను ఈ కార్యక్రమంలో అందజేశారు. అలాగే ఈ డైరీని గానగంధర్వుడు ఎస్‌.పి.బాలసుబ్రమణ్యంకి అంకితమిచ్చారు.
ఈ సందర్భంగా వి.కె.నరేష్‌ మాట్లాడుతూ,'గత ఏడేండ్లుగా వీబీ ఎంటర్‌టైన్మెంట్స్‌ అధినేత విష్ణు బొప్పన డైరీని తీసుకురావడంతోపాటు బుల్లితెర అవార్డులు, వెండితెర అవార్డులు ఇవ్వడం. అలాగే పేద సినీ, టీవీ కళాకారుల ఆదుకోవటం, కోవిడ్‌ లాంటి విపత్కర పరిస్థితుల్లో కూడా ఈ కార్యక్రమాలను నిరాఘాటంగా చేస్తున్నందుకు ధన్యవాదాలు' అని చెప్పారు.
'ఇన్ని కార్యక్రమాలను నిర్వహిస్తూ కూడా ఇంకా ఏదో చేయాలని తపన పడుతున్న విష్ణు బొప్పనకి, ఆయనకు సహకరిస్తున ప్రతి ఒక్కరికి కృతజ్ఞతలు. మరింత మందికి ఉపయోగపడే మరిన్ని కార్యక్రమాలను నిర్వహించాలని కోరుకుంటున్నాను' అని నటుడు శివ బాలాజీ చెప్పారు. వీబీ ఎంటర్‌టైన్మెంట్స్‌ అధినేత విష్ణు బొప్పన మాట్లాడుతూ, 'ఈ కార్యక్రమాలకు సపోర్ట్‌ చేస్తున్న స్పాన్సర్లకు, శ్రేయోభిలాషులకు కృతజ్ఞతలు' అని తెలిపారు.
