'వైద్యం చేయాల్సిన డాక్టర్‌ గన్‌ చేతపట్టి హ్యూమన్‌ ట్రాఫికింగ్‌ మాఫియాలోకి ఎందుకు వచ్చాడు?, దాన్ని ఎలా అరికట్టాడు? అనేది తెలియాలంటే విజయదశమి కానుకగా విడుదలవుతున్న మా 'వరుణ్‌ డాక్టర్‌' చిత్రాన్ని థియేటర్లలో చూడాల్సిందే' అని అంటున్నారు నిర్మాత కోటపాటి జె.రాజేష్‌.
హ్యూమన్‌ ట్రాఫికింగ్‌ నేపథ్యంలో శివ కార్తికేయన్‌ హీరోగా నటించిన చిత్రం 'వరుణ్‌ డాక్టర్‌'. తమిళ స్టార్‌ హీరో విజరు 'బీస్ట్‌' చిత్రానికి దర్శకత్వం వహిస్తున్న నెల్సన్‌ దిలీప్‌ కుమార్‌ ఈ చిత్రాన్ని తెరకెక్కించారు. కె.జె.ఆర్‌. స్టూడియోస్‌ అధినేత కోటపాడి జె. రాజేష్‌ ఈ చిత్రాన్ని గంగ ఎంటర్టైన్మెంట్స్‌, ఎస్‌.కెప్రొడక్షన్స్‌ సంస్థలతో సంయుక్తంగా నిర్మించారు. విజయదశమి కానుకగా తెలుగు, తమిళ భాషల్లో అక్టోబర్‌ 9న ఈ సినిమా ప్రేక్షకుల ముందుకు వస్తోంది. ఇటీవల విడుదల చేసిన ట్రైలర్‌కి ప్రేక్షకుల నుంచి సూపర్‌ రెస్పాన్స్‌ లభిస్తోంది. 1.5 మిలియన్‌ వ్యూస్‌తో యూట్యూబ్‌లో ట్రెండింగ్‌లో ఉంది.
ఈ సందర్భంగా నిర్మాత కోటపాడి జె. రాజేష్‌ మాట్లాడుతూ, ''శివ కార్తికేయన్‌కి తమిళనాడుతో పాటు తెలుగు రాష్ట్రాల్లోనూ అభిమానులు ఉన్నారు. ట్రైలర్‌కు అనూహ్య స్పందన లభిస్తోంది. ట్రైలర్‌లో ఆయన స్టైలిష్‌ లుక్‌, నటన అందరినీ ఆకట్టుకుంటోంది. సినిమాలో హీరో పాత్ర చిత్రణ సైతం అందరినీ ఆకట్టుకుంటుందనే నమ్మకం ఉంది. దర్శకుడు నెల్సన్‌ దిలీప్‌ కుమార్‌ అద్భుతమైన కథ, కమర్షియల్‌ హంగులతో అత్యద్భుతంగా తీశారు. ప్రేక్షకులకు మంచి థ్రిల్‌ ఇస్తుంది. 'వాన'లో హీరోగా నటించిన వినరు, ఇందులో ప్రతినాయకుడిగా నటించారు. అలాగే, 'గ్యాంగ్‌ లీడర్‌' ఫేమ్‌ ప్రిియాంక అరుల్‌ మోహన్‌ నాయికగా నటించారు. సంగీత సంచలనం అనిరుధ్‌ అందించిన పాటలకు తమిళంలో అద్భుత స్పందన లభించింది. త్వరలో తెలుగు పాటలను విడుదల చేస్తాం. విజయదశమికి ప్రేక్షకులందరూ కుటుంబంతో కలిసి చూసే చక్కటి చిత్రమిది' అని తెలిపారు.
దర్శకుడు నెల్సన్‌ దిలీప్‌ కుమార్‌ మాట్లాడుతూ, 'ఇదొక మాస్‌ ఎంటర్టైనర్‌. ట్రైలర్‌కు అన్ని వర్గాల ప్రేక్షకుల నుండి చక్కటి స్పందన లభించడం సంతోషంగా ఉంది. సినిమా సైతం అందరినీ తప్పకుండా అలరిస్తుంది' అని అన్నారు.
