కార్తికేయ నటించిన తాజా చిత్రం 'రాజా విక్రమార్క'. శ్రీ చిత్ర మూవీ మేకర్స్‌ పతాకంపై ఆదిరెడ్డి.టి సమర్పణలో '88' రామారెడ్డి నిర్మిస్తున్నారు. శ్రీ సరిపల్లి దర్శకుడిగా పరిచయం అవుతున్నారు. కార్తికేయ సరసన తాన్యా రవిచంద్రన్‌ హీరోయిన్‌గా నటిస్తున్న ఈ సినిమా చిత్రీకరణ పూర్తయింది. నిర్మాణాంతర కార్యక్రమాల్లో భాగంగా ప్రస్తుతం రీ-రికార్డింగ్‌ పనులు శరవేగంగా జరుగుతున్నాయి.
ఈ సందర్భంగా నిర్మాత '88' రామారెడ్డి మాట్లాడుతూ, 'ఈ సినిమా కథంతా హైదరాబాద్ నేపథ్యంలో జరుగుతుంది. ఇందులో దేవాలయానికి సంబంధించిన కొన్ని సన్నివేశాలు ఉన్నాయి. కథ ప్రకారం పురావస్తు శాఖవారు క్లోజ్‌ చేసిన దేవాలయమై ఉండాలి. లక్కీగా మాకు గండికోటలో అటువంటి టెంపుల్‌ దొరికింది. అందులో దర్భార్‌ సెట్‌ వేసి కీలక సన్నివేశాలు చిత్రీకరించాం. మారేడుమిల్లిలో అందరూ చిత్రీకరిస్తున్న లొకేషన్‌లో కాకుండా యూనీక్‌ లొకేషన్‌కు వెళ్లి, భారీ రబ్బరు ఫారెస్టులో కీలక సన్నివేశాలు తీశాం. డంప్‌ యార్డ్‌లో ప్రీ క్లైమాక్స్‌ చిత్రీకరించాం. మేకింగ్‌ పరంగా ఎక్కడ రాజీ పడలేదు. హీరో కార్తికేయ సహకారంతో సినిమా బాగా వచ్చింది. అతి త్వరలో విడుదల తేదీ వెల్లడిస్తాం' అని చెప్పారు.
'కార్తికేయ క్యారెక్టరైజేషన్‌ సినిమాకి హైలైట్‌ అవుతుంది. ఆయన ఎన్‌ఐఏ ఏజెంట్‌గా కనిపిస్తారు. ఎంటర్టైనింగ్‌గా సాగే యాక్షన్‌ రోల్‌కు కార్తికేయ హండ్రెడ్‌ పర్సెంట్‌ న్యాయం చేశారు' అని దర్శకుడు శ్రీ సరిపల్లి అన్నారు.
