కార్తీక్‌రాజు హీరోగా నటిస్తున్న తాజా చిత్రం 'వస్తున్నా.. వచ్చేస్తున్నా'. మిస్తి చక్రవర్తి నాయిక. తేజస్వి క్రియేటివ్‌ వర్క్స్‌ పతాకంపై సందీప్‌ గోపిశెట్టి స్వీయ దర్శకత్వంలో రూపొందుతున్న చిత్రమిది. ఈ చిత్ర ఫస్ట్‌లుక్‌ పోస్టర్‌ను దర్శకుడు శేఖర్‌కమ్ముల విడుదల చేశారు.
ఈ సందర్భంగా ఆయన మాట్లాడుతూ 'కార్తీక్‌రాజు నటించిన ఈ చిత్రం ఫస్ట్‌లుక్‌ ఇంప్రెసివ్‌గా ఉంది. సినిమా కూడా ప్రేక్షకులను అలరించేలా ఉంటుందని అను కుంటున్నా. ఈ చిత్రం విజయం సాధించి అందరికి మంచిపేరు తీసుకరావాలని ఆశిస్తున్నాను' అని అన్నారు.
దర్శక, నిర్మాత సందీప్‌ గోపిశెట్టి మాట్లాడుతూ, 'దర్శకుడు శేఖర్‌ కమ్ముల గారితో ఫస్ట్‌లుక్‌ విడుదల కావడం మా విజయానికి శ్రీకారంలా భావిస్తున్నాం. పూర్తి కమర్షియల్‌ అంశాలతో రూపొందిన ఫ్యామిలీ ఎమోషనల్‌ థ్రిల్లర్‌ ఇది. ఆడియన్స్‌ సర్‌ఫ్రైజ్‌గా ఫీలయ్యే ఎన్నో అంశాలు ఈ చిత్రంలో ఉన్నాయి. కొత్తదనంతో, నిజాయితీగా తెరకెక్కించిన ఈ చిత్రం తప్పకుండా అన్ని వర్గాల ఆదరణ పొందుతుందనే నమ్మకం ఉంది. ప్రస్తుతం నిర్మాణానంతర పనులు జరుగుతున్నాయి. త్వరలోనే టీజర్‌ని రిలీజ్‌ చేస్తాం' అన్నారు.
