ప్రముఖ కూచిపూడి నర్తకి సంధ్యారాజు నటిస్తూ, స్వయంగా నిర్మించిన సినిమా 'నాట్యం'. రేవంత్‌ కోరుకొండ దర్శకత్వంలో నిశ్రింకళ ఫిల్మ్ పతాకంపై రూపొందిన చిత్రమిది. ఈ నెల 22న ఈ సినిమా ప్రేక్షకుల ముందుకు రాబోతుంది.
ఈ నేపథ్యంలో ఈ సినిమా గురించి అగ్ర కథానాయకుడు చిరంజీవి మాట్లాడుతూ, ''నాట్యం' సినిమా చాలా చక్కగా అనిపించింది. మంచి ఫీలింగ్‌ కలిగించింది. 'నాట్యం' అంటే ఓ కథను అందంగా, దశ్యరూపంలో చూపించడం. 'నాట్యం' అంటే కాళ్లు, చేతులు లయబద్దంగా ఆడించడం అనుకుంటారు. కానీ దర్శకుడు రేవంత్‌, సంధ్యా రాజు మాత్రం కథను అందంగా చెప్పడం అని నిరూపించారు. ఇలాంటి చిత్రాలు అనగానే మనకు కె.విశ్వనాథ్‌గారు గుర్తొస్తారు. ఆయన్ని స్ఫూర్తిగా తీసుకునే ఈ సినిమా తీసినట్టు నాకు అనిపిస్తోంది. విశ్వనాథ్‌ తర్వాత యువ దర్శకుడు రేవంత్‌ మళ్లీ ఇలాంటి ప్రయత్నం చేయడం ఎంతో అభినందనీయం. మన ఆచారాలు, సంప్రదాయాలు, కళలను మరిచిపోతున్న ఈ తరంలో ఇలాంటి సినిమా రావడం సంతోషంగా ఉంది. ఈ ప్రయత్నాన్ని మనస్ఫూర్తిగా అభినందిస్తున్నాను. దానికి ఆలంబనగా, ఎంతో ప్యాషన్‌ ఉన్న సంధ్యా రాజు ముందుకు రావడాన్ని మనం అభినందించాలి. పెద్ద ఫ్యామిలీ నుంచి వచ్చారు. డబ్బు కోసమని కాకుండా తనకున్న ప్యాషన్‌, కళల పట్ల తనకున్న అంకిత భావాన్ని తెలియజేస్తుంది. ఈ సినిమా ద్వారా 'నాట్యం' గొప్పదనం కోట్ల మందికి చేరుతుంది. ఇండిస్టీని 'శంకరాభరణం' ముందు 'శంకరాభరణం' తరువాత అని అంటుంటారు. అలా 'శంకరాభరణం' సినిమాని ఎంతగా ఆదరించారో, అలానే ఈ సినిమాకి కూడా ప్రజాశీస్సులు ఉంటాయని ఆశిస్తున్నాను. ప్రేక్షకులు తప్పకుండా ఆదరిస్తారనే నమ్మకం నాకు ఉంది. ఈ చిత్రం ఎప్పుడు చూస్తానా? అని నాకు కూడా ఆత్రుతగా ఉంది' అని అన్నారు.
డైరెక్టర్‌ రేవంత్‌ మాట్లాడుతూ, 'ఇందులో కేవలం నాట్యం గురించే కాకుండా మన సంస్కతి కూడా చూపించాం. ఇది తెలుగుదనం ఉట్టిపడే సినిమా. అన్ని రకాల ఎమోషన్స్‌ ఉంటాయి. చిరంజీవి గారు మా సినిమాని సపోర్ట్‌ చేయడం చాలా ఆనందంగా ఉంది' అని చెప్పారు.
'ఏ కళ కూడా డబ్బుతో రాదు.. ఎంతో అంకితభావం, కష్టపడితే గానీ రాదని తెలిసింది. 'నాట్యం' వల్ల ప్రజలు మనల్ని గౌరవిస్తారు అని, నా జీవితాన్ని నాట్యానికి అంకితం చేశాను. ఈ ప్రయాణంలో చిరంజీవి గారిని కలవడం నాకు ఎంతో సంతోషంగా ఉంది. ఆయన గొప్ప డ్యాన్సర్‌. ఆయన సూర్యుడిలాంటి వారు. మాకు ఆయన ఆశీర్వాదం లభించడం ఆనందంగా ఉంది. ఈ సినిమాతో ఓ మంచి ప్రయత్నం చేశాం. మా ప్రయత్నాన్ని ప్రేక్షకులు తప్పకుండా ఆదరిస్తారని ఆశిస్తున్నాను.
- నిర్మాత, నటి సంధ్యా రాజు
