రజనీకాంత్‌ లేటెస్ట్‌గా నటిస్తున్న యాక్షన్‌ ఎంటర్‌టైనర్‌ 'అన్నాత్తె'. తెలుగులో 'పెద్దన్న' టైటిల్‌తో రాబోతుంది. 'అన్నాత్తై' సినిమా తెలుగు రైట్స్‌ను ఏషియన్‌ ఇన్‌ ఫ్రా ఎస్టేట్స్‌ ఎల్‌ఎల్‌పి సంస్థ సొంతం చేసుకుంది. ఈ చిత్రాన్ని తెలంగాణ, ఆంధ్రప్రదేశ్‌లో నారాయణదాస్‌ నారంగ్‌, సురేష్‌ బాబు సంయుక్తంగా తెలుగు ప్రేక్షకులకు అందిస్తున్నారు. తాజాగా ఈ చిత్ర టీజర్‌ను శనివారం అగ్ర కథానాయకుడు వెంకటేష్‌ రిలీజ్‌ చేశారు. 'ఈ టీజర్‌ తెలుగు ప్రేక్షకులను విశేషంగా అలరిస్తోంది. ఇందులో మాస్‌ ప్రేక్షకులకు కావాల్సిన అంశాలు పుష్కలంగా ఉన్నాయి. డైలాగ్స్‌, యాక్షన్‌ సీక్వెన్స్‌లు, రజనీ మార్క్‌ స్టైల్‌తో రాబోతున్న ఉన్న టీజర్‌ సినిమాపై అంచనాలను మరింతగా పెంచింది. ఇప్పటికే రిలీజ్‌ చేసిన పోస్టర్లకు అద్భుతమైన స్పందన వచ్చింది. తాజాగా టీజర్‌ సైతం అందరినీ ఆకట్టుకుంటూ ట్రెండింగ్‌లో ఉంది. డి.ఇమ్మాన్‌ అందించిన బ్యాక్‌ గ్రౌండ్‌ స్కోర్‌ అందరినీ మెప్పించేలా ఉంది. శివ దర్శకత్వంలో రాబోతున్న ఈ చిత్రంలో రజనీకాంత్‌ సరసన నయనతార నటించింది. మీనా, కుష్బూ, కీర్తి సురేష్‌, జగపతి బాబు, ప్రకాష్‌ రాజ్‌ ముఖ్య పాత్రల్లో కనిపించనున్నారు. ఈ సినిమాను దీపావళి కానుకగా నవంబర్‌ 4న అత్యధిక థియేటర్లలో భారీ ఎత్తున రిలీజ్‌ చేస్తున్నారు' అని చిత్ర బృందం తెలిపింది.
