హన్సిక మొత్వాని కథానాయికగా రూపొందుతున్న చిత్రం '105 మినిట్స్‌'. ఇండియన్‌ స్క్రీన్‌పై మొట్ట మొదటి సారిగా సింగిల్‌ షాట్‌, సింగిల్‌ క్యారెక్టర్‌తో ఉత్కంఠ భరితంగా సాగి పోయే కథాకథనంతో తెరకెక్కుతున్న సినిమా ఇది. ఈ చిత్ర గ్లింప్స్‌ వీడియోని ప్రముఖ సినిమాటోగ్రాఫర్‌ కె.కె.సెంథిల్‌కుమార్‌ విడుదల చేశారు.
ఈ సందర్భంగా ఆయన మాట్లాడుతూ, 'హాలీవుడ్‌లో మాత్రమే ప్రయత్నించిన సింగిల్‌ షాట్‌ చిత్రీకరణకి నేను పెద్ద అభిమానిని. అలా మన వాళ్లెవరూ చేయట్లేదు అని అనుకుంటుండగా ఈ చిత్రాన్ని దర్శకుడు రాజు చేసి చూపిస్తున్నారు. కథ, కథనం చాలా థ్రిల్లింగ్‌గా అనిపించాయి. 105 మినిట్స్‌ సింగిల్‌ షాట్‌ అంటే ఒక టెక్నీషియన్‌గా అది ఎంత కష్టమో నాకు తెలుసు. మన తెలుగు పరిశ్రమలో ఇలాంటి కొత్త తరహా ఆలోచనతో కథలు తెరకెక్కిస్తున్నందుకు చాలా గర్వంగా ఉంది. ఇలాంటి ఒక రిస్కీ చిత్రాన్ని ప్రొడ్యూస్‌ చేయడానికి చాలా గట్స్‌ ఉండాలి. అనుక్కున్నట్టుగా తీసిన చిత్ర బందం అందరికీ ఈ సినిమా పెద్ద సక్సెస్‌ ఇవ్వాలని కోరుకుంటున్నాను' అని అన్నారు. 'రాజు దుస్సా దర్శకత్వం వహిస్తున్న ఈ చిత్రాన్ని రుధ్రాన్ష్‌ సెల్యూలాయిడ్‌ పతాకం పై బొమ్మక్‌ శివ నిర్మిస్తున్నారు. చిత్రీకరణ పూర్తయ్యింది. నిర్మాణాంతర కార్యక్రమాలు శరవేగంగా జరుగుతున్నాయి' అని చిత్ర యూనిట్‌ పేర్కొంది. ఈ చిత్రానికి డిఓపి : కిషోర్‌ బొయిదాపు, మ్యూజిక్ : సామ్‌ సి.యస్‌, ఆర్ట్‌ : బ్రహ్మ కడలి, ఎగ్జిక్యూటివ్‌ ప్రొడ్యూసర్‌ : రూపాకిరణ్‌ గంజి.
