బాలకష్ణ, బోయపాటి శ్రీను కాంబినేషన్‌లో రూపొందుతున్న తాజా చిత్రం 'అఖండ'. వీరిద్దరి కలయికలో హ్యాట్రిక్‌ మూవీగా రాబోతున్న ఈ సినిమా పోస్ట్‌ ప్రొడక్షన్‌ కార్యక్రమాలను పూర్తి చేసుకుని విడుదలకు సిద్ధమైంది. ఈ నేపథ్యాన్ని పురస్కరించుకుని ఈచిత్ర ట్రైలర్‌ను ఆదివారం చిత్ర బృందం రిలీజ్‌ చేసింది.
ఈ సందర్భంగా చిత్ర యూనిట్‌ మాట్లాడుతూ, 'ఆదివారం రిలీజ్‌ చేసిన ట్రైలర్‌కు అద్భుతమైన రెస్పాన్స్‌ వస్తోంది. బాలయ్య డైలాగ్‌లకు, ఆయన నట విశ్వరూపానికి అందరూ విజిల్స్‌ వేస్తున్నారు. 'విధికి, విధాతకు, విశ్వానికి సవాళ్లు విసరకూడదు'.. అంటూ ట్రైలర్‌ మొదలవుతుంది. 'అంచనా వేయడానికి పోలవరం డ్యామా? పట్టిసీమ తూమా?.. పిల్ల కాలువ', 'ఒక మాట నువ్వంటే శబ్దం.. అదే నేను అంటే శాసనం.. దైవ శాసనం', 'మీకు సమస్య వస్తే దండం పెడతారు.. నేను పిండం పెడతాను', 'అఖండ.. నేనే.., నేనే..నేనే' అంటూ బాలకష్ణ చెప్పిన డైలాగ్స్‌ అద్బుతంగా ఉన్నాయి. 'నాకు బురద అంటింది.. నాకు దురద వచ్చింది.. నాకు బ్లడ్‌ వచ్చింది.. గడ్డ వచ్చింది అని అడ్డమైన సాకులు చెబితే' అంటూ శ్రీకాంత్‌ కూడా తన విలనిజాన్ని చూపించారు. రెండు గెటప్స్‌లో బాలకష్ణ కనిపించి మెప్పించారు. జగపతి బాబు తన పాత్రలో ఒదిగిపోయారు. తమన్‌ బ్యాక్‌ గ్రౌండ్‌ స్కోర్‌తో ట్రైలర్‌ అదిరిపోయింది. నిర్మాత మిర్యాల రవీందర్‌ రెడ్డి ప్రొడక్షన్‌ వ్యాల్యూస్‌ రిచ్‌గా ఉన్నాయి. ఈ చిత్రాన్ని డిసెంబర్‌ 2న ప్రపంచ వ్యాప్తంగా విడుదల చేయనున్నట్టు ట్రైలర్‌ ద్వారా అధికారంగా మేకర్స్‌ ప్రకటించారు. దీంతో ఈ చిత్రానికి సంబంధించిన ప్రమోషన్‌ కార్యక్రమాలను వినూత్న రీతిలో చేసేందుకు సిద్ధమయ్యారు. బాలకష్ణ పాత్రను పరిచయం చేస్తూ విడుదల చేసిన టీజర్‌కు విశేషమైన స్పందన వచ్చింది. మొదటి పాట మెలోడి కాగా, రెండో పాట మాస్‌ ప్రేక్షకులను కట్టిపడేసింది. మాస్‌ యాక్షన్‌ ఎంటర్‌టైనర్‌గా తెరకెక్కిన ఈ చిత్రంలో బాలకష్ణ సరసన ప్రగ్యా జైస్వాల్‌ నటిస్తున్నారు. ద్వారకా క్రియేషన్స్‌ పతాకంపై రూపొందుతున్న ఈ చిత్రానికి సి. రాం ప్రసాద్‌ కెమెరామెన్‌గా, కోటగిరి వెంకటేశ్వర రావు ఎడిటర్‌గా వ్యవహరిస్తున్నారు' అని తెలిపారు.
