నందమూరి కళ్యాణ్‌ హీరోగా నందమూరి తారక రామారావు ఆర్ట్స్‌ పతాకంపై రూపొందుతున్న చిత్రం 'బింబిసార'. హరికష్ణ.కె నిర్మిస్తున్న ఈ చిత్రంతో వశిష్ట్‌ని దర్శకుడిగా పరిచయం అవుతున్నారు. సోమవారం ఈ చిత్ర టీజర్‌ను కళ్యాణ్‌ రామ్‌ ట్విట్టర్‌ ద్వారా రిలీజ్‌ చేశారు. ఏ టైమ్‌ ట్రావెల్ ఈవిల్‌ టు గుడ్‌ అనే క్యాప్షన్‌ను కూడా పోస్ట్‌ చేశారు.
'త్రిగర్త్తల సామ్రాజ్యాధినేత బింబిసారుడు ఏక చత్రాధిపత్యం కోసం రాజ్యాలపై దాడులు చేయడం, ఇతర రాజులను సామంతులను చేసుకోవడం.. ఎదురు తిరిగిన వారిని చంపేయడం వంటి పనులను చేశారనే విషయాన్ని టీజర్‌ ద్వారా తెలియజేశారు. బింబిసారుడిగా కళ్యాణ్‌ రామ్‌ లుక్‌ సింప్లీ సూపర్బ్‌. ఓ సమూహం తాలుకు ధైర్యాన్ని ఓ ఖడ్గం శాసిస్తే, కొన్ని వందల రాజ్యాలు ఆ ఖడ్గానికి తల వంచి బానిసలైతే.. ఇందరి భయాన్ని చూస్తూ ఒకరితో ఓ రాజ్యం మీసం మెలేసింది. అదే త్రిగర్తల సామ్రాజ్యపు నెత్తుటి సంతకం. బింబిసారుడి ఏక చత్రాధిపత్యం.. అనే పవర్‌ ఫుల్‌ డైలాగ్‌తో కళ్యాణ్‌ రామ్‌ బింబిసారుడి పాత్రను ఎలివేట్‌ చేసిన తీరు, టీజర్‌ చివరలో ప్రస్తుత కాలానికి చెందిన యువకుడిగా హీరో కళ్యాణ్‌ రామ్‌ విలన్స్‌తో తలపడటం చూపించారు. టీజర్‌తోనే సినిమా ఎలా ఉండబోతుంది?, ఎలాంటి ఎలిమెంట్స్‌ను ఎలివేట్‌ చేయబోతున్నామని మేకర్స్‌ తెలిపారు. ముఖ్యంగా పీరియాడిక్‌ బ్యాక్‌డ్రాప్‌కు సంబంధించిన విజువల్స్‌ ఆడియెన్స్‌ను కట్టిపడేస్తున్నాయి' అని చిత్రయూనిట్‌ పేర్కొంది.
నిర్మాతలు మాట్లాడుతూ, 'ప్రస్తుతం నిర్మాణానంతర కార్యక్రమాలు జరుగుతున్నాయి. కళ్యాణ్‌ రామ్‌ కెరీర్‌లోనే భారీ బడ్జెట్‌తో రూపొందుతున్న హై టెక్నికల్‌ వ్యాల్యూస్‌ ఉన్న చిత్రమిది. కళ్యాణ్‌ రామ్‌ సరసన క్యాథరిన్‌ ట్రెస్సా, సంయుక్తా మీనన్‌ హీరోయిన్స్‌గా నటిస్తున్నారు. త్వరలోనే సినిమాకు సంబంధించిన మరిన్ని వివరాలను తెలియజేస్తాం' అని అన్నారు.
