బాలకష్ణ, స్టార్‌ డైరెక్టర్‌ బోయపాటి శ్రీను కాంబినేషన్‌లో రూపొందిన హ్యాట్రిక్‌ చిత్రం 'అఖండ'. ఇటీవల ప్రపంచవ్యాప్తంగా విడుదలైన ఈ సినిమా భారీ కలెక్షన్లు సాధిస్తోంది. ఈ సినిమా సక్సెస్‌ను ఫైట్‌ మాస్టర్‌ స్టన్‌ శివ, ఆయన తనయులు కెవిన్‌, స్టీవెన్‌ మీడియాతో షేర్‌ చేసుకున్నారు.
   ఈ సందర్భంగా స్టన్‌ శివ మాట్లాడుతూ,'అఖండ సినిమాలో అఘోర ఎంట్రీ నుంచి క్లైమాక్స్‌ వరకు నేను ఫైట్స్‌ కంపోజ్‌ చేశాను. ఈ ఫైట్స్‌ ఇంత బాగా రావడానికి బోయపాటి శ్రీను, బాలకష్ణ గారే కారణం. ప్రతీ సినిమాకు కూడా బాగా ఫైట్స్‌ కంపోజ్‌ చేయాలి, అవార్డులు రావాలనే చేస్తాం. అయితే ఆ హీరో కూడా మేం అనుకున్న మూడ్‌లోకి వచ్చి, మాస్టర్‌ చెప్పినట్టుగా చేస్తే అది కుదురుతుంది. బాలయ్య బాబు అద్బుతంగా చేశారు. ఈ సినిమా కోసం 80 రోజులు పని చేశాను. 60 నుంచి 65 రోజులు కేవలం యాక్షన్‌ సీక్వెన్స్‌ కోసమే చేశాను. మిగిలిన రోజుల్లో ఎలివేషన్స్‌ గురించి దర్శకుడితో ప్రయాణం చేశాను. ఇది వరకు నేను 'సింహా' సినిమాకు ఇంట్రడక్షన్‌ ఫైట్‌ చేశాను. బోయపాటి గారు వేరే లెవెల్‌. ఆయన కథ చెప్పిన విధానం విన్న తరువాత..ఫైట్స్‌ ఎలా కంపోజ్‌ చేయాలా అని నా కుమారులిద్దరితో కలిసి ఆలోచించాను. అఘోరా అంటే మామూలు మనిషి కాదు. తెలుగు ఇండిస్టీ అంటే మాస్‌, మంచి యాక్షన్‌ సీక్వెన్స్‌లను కోరుకుంటారు. అందులోనూ బాలయ్య గారంటే చెప్పక్కర్లేదు. హై లెవెల్‌లో ఉండాలి. డిఫరెంట్‌గా ఉండాలని ఫైట్లని డిజైన్‌ చేశాం. బోయపాటి గారి ఎనర్జీ, బాడీ లాంగ్వేజ్‌ ఓ ఫైట్‌ మాస్టర్‌లానే ఉంటుంది. ఫైట్స్‌ ఇంత బాగా రావడానికి నిర్మాత మిర్యాల రవీందర్‌ రెడ్డి గారు కూడా ఎంతో సపోర్ట్‌ చేశారు. ఈ సినిమాకి నా కొడుకులు మంచి ఐడియాస్‌ ఇచ్చారు. మధ్యలో వాళ్లు ఇచ్చిన ఐడియాలు చూసి లోలోపల ఈర్ష్యపడ్డాను. తెలుగు ఆడియెన్స్‌ ఫుల్‌ మాస్‌. కొడితే అవతల పడిపోవాలని అనుకుంటారు. తమిళంలో అలా కుదరదు. కానీ రజనీకాంత్‌ వంటి స్టార్‌ హీరోలకు మాత్రం అక్కడ కూడా అలా సెట్‌ అవుతుంది. బాలయ్య నుంచి ఏం కోరుకుంటారో అది కచ్చితంగా ఆయన అభిమానులకు, ప్రేక్షకులకు ఇవ్వాల్సిందే. ఆయనతో నాలుగు సినిమాలకు పని చేశాను. ఈ ఫైట్లు ఇంత క్లిక్‌ అవ్వడానికి తమన్‌ బ్యాక్‌ గ్రౌండ్‌ స్కోర్‌ మెయిన్‌ హైలెట్‌. ఆయన ఇచ్చిన ఆర్‌ఆర్‌ వల్లే ఇంత బాగా ఎఫెక్ట్‌ వచ్చింది. మేం ఈ సినిమాకు ఫైట్‌ మాస్టర్స్‌లా పని చేయలేదు. ఫ్యాన్స్‌లా పని చేశాం. ఇండియన్‌ సినిమాకు బాలయ్య ఓ సూపర్‌ హీరో. తెలుగులో నేను నటుడిగా బిజీగా అవుతున్నాను. 'ఎఫ్‌ 3'లో నేనే మెయిన్‌ విలన్‌. 'క్రాక్‌' తర్వాత నటుడిగా మరిన్ని ఆఫర్లు వస్తున్నాయి' అని తెలిపారు.