పవన్‌ కళ్యాణ్‌, రానా దగ్గుబాటి కాంబినేషన్‌లో సితార ఎంటర్‌ టైన్మెంట్స్‌ నిర్మిస్తున్న చిత్రం 'భీమ్లా నాయక్‌'. స్క్రీన్‌ ప్లే- సంభాషణలు దర్శకుడు, రచయిత త్రివిక్రమ్‌ అందిస్తుండగా, నిర్మాత సూర్యదేవర నాగవంశీ నిర్మిస్తున్న ఈ చిత్రానికి సాగర్‌ కె చంద్ర దర్శకత్వం వహిస్తున్నారు. మంగళవారం రానా పుట్టినరోజు సందర్భంగా ఈ చిత్రం నుంచి ఆయన పోషిస్తున్న డేనియల్‌ శేఖర్‌ పాత్రకు సంబంధించిన ఓ ప్రచార చిత్రాన్ని మేకర్స్‌ రిలీజ్‌ చేశారు. 'పవన్‌ కళ్యాణ్‌ కూడా కనిపించే ఈ ప్రచార చిత్రాన్ని పరిశీలిస్తే, 'వాడు అరిస్తే భయపడతావా.. ఆడికన్నా గట్టిగా అరవగలను..ఎవడాడు??, దీనమ్మ దిగొచ్చాడా... ఆఫ్ట్రాల్‌ ఎస్‌ఐ.. సస్పెండెడ్‌....' అంటూ చిత్ర కథానుసారం డేనియల్‌ శేఖర్‌ పాత్రధారి రానా ఎవరితోనో ఆవేశంగా సంభాషిస్తున్నారు. ఈ సన్నివేశం ఆద్యంతం సినిమాపై మరింత ఉత్సుకతను రేకెత్తిస్తోంది. ప్రస్తుతం సినిమా నిర్మాణ కార్యక్రమాలు ముగింపు దశలో ఉన్నాయి' అని చిత్ర బృందం తెలిపింది.
