నందమూరి బాలకష్ణ, బోయపాటి శ్రీను మాస్‌ కాంబినేషన్‌కు ఉన్న క్రేజ్‌ను 'అఖండ'తో మరోసారి నిరూపితమైంది. విశేష ప్రేక్షకాదరణతోపాటు కలెక్షన్లతో బాక్సాఫీస్‌ని షేక్‌ చేస్తూ ఈ సినిమా దిగ్విజయంగా 25 రోజులను పూర్తి చేసుకుంది. నాలుగో వారంలో కూడా భారీ కలెక్షన్లను రాబడుతూ అర్ధశత దినోత్సవానికి పరుగులు తీస్తోంది. ఈ నేపథ్యాన్ని పురస్కరించుకుని చిత్రయూనిట్‌ విజయోత్సవాలు నిర్వహించింది.
శనివారం సాయంత్రం ఏర్పాటు చేసిన సక్సెస్‌ సెలెబ్రేషన్స్‌లో బాలకష్ణ, బోయపాటి శ్రీను, నిర్మాత మిర్యాల రవీందర్‌ రెడ్డి సహా చిత్రయూనిట్‌ పాల్గొంది. ఈ ఈవెంట్‌లో చిత్రయూనిట్‌కు బాలకష్ణ, బోయపాటి శ్రీను, మిర్యాల రవీందర్‌ రెడ్డి సక్సెస్‌ షీల్డ్‌ను అందించారు. రెండు తెలుగు రాష్ట్రాల్లో ఈ చిత్రాన్ని విడుదల చేసిన డిస్ట్రిబ్యూటర్లు కూడా ఈ సక్సెస్‌ సెలెబ్రేషన్స్‌లో పాల్గొన్నారు.
'2021లో 'అఖండ' బిగ్గెస్ట్‌ బ్లాక్‌ బస్టర్‌గా నిలిచింది. విడుదలైన అన్ని ఏరియాల్లోని డిస్ట్రిబ్యూటర్లకు, నిర్మాతకు లాభాలను తెచ్చిపెట్టింది. బాలకష్ణ కెరీర్‌లో అత్యధిక గ్రాస్‌ సాధించిన చిత్రంగా 'అఖండ' నిలిచింది. ఓవర్సీస్‌లో వన్‌ మిలియన్‌ డాలర్లను కలెక్ట్‌ చేసి రికార్డులు క్రియేట్‌ చేసింది. ఈ సినిమా సాధించిన ఘనవిజయంతో టాలీవుడ్‌లో కొత్త ఆశలు చిగురించాయి. మాస్‌ సబ్జెక్ట్‌ను హ్యాండిల్‌ చేయడంలో బోయపాటి తనకు తానే సాటి అని మరోసారి నిరూపించారు. ఇక బాలకష్ణ నటవిశ్వరూపానికి అవార్డులు రావాల్సిందే. ఈ సినిమాతో బాలకష్ణ, బోయపాటి హ్యాట్రిక్‌ హిట్‌ సాధించారు. అలాగే ఈ సినిమాకి తమన్‌ సంగీతం అతిపెద్ద బలంగా నిలిచింది. రామప్రసాద్‌ సినిమాటోగ్రఫీ, ద్వారకా క్రియేషన్స్‌ నిర్మాణ విలువలు.. ఇలా అన్నీ ఈ చిత్రాన్ని ఘన విజయాన్ని చేశాయి' అని చిత్ర యూనిట్‌ పేర్కొంది.
