'సినిమా టికెట్‌ రేట్ల విధానంపై ప్రభుత్వం విడుదల చేసిన జీవో.నెం120 అందరికీ ఆమోద యోగ్యంగా ఉంది. ముఖ్యమంత్రి కేసీఆర్‌గారికి, కేటీఆర్‌గారికి, మంత్రి తలసాని శ్రీనివాస్‌ యాదవ్‌ గారికి ఈ సందర్భంగా ధన్యవాదాలు తెలియజేస్తున్నాం' అని తెలంగాణ స్టేట్‌ ఫిలిం ఛాంబర్‌ ఆఫ్‌ కామర్స్‌ అధ్యక్షుడు సునిల్‌ నారంగ్‌ (ఏషియన్‌ సునిల్‌) చెప్పారు. ఈ సందర్భంగా ఏర్పాటు చేసిన మీడియా సమావేశంలో ఆయన మాట్లాడుతూ, 'చిన్న సినిమాలు 50 -150 రూపాయల వరకూ టికేట్‌ రేటుకి అమ్ముకోవచ్చు. అధిక ధరలకు టికెట్లు విక్రయించకూడదని నిర్మాతలకు విజ్ఞప్తి చేస్తున్నాం. కొన్ని థియేటర్స్‌లో టికెట్‌ రేట్లు ఎక్కువ రేటుకి అమ్మడం మా దష్టికి వచ్చింది. మేం వెంటనే స్పందించి, ఆ రేట్లను సవరించి, మిగతా డబ్బుని వారి ఎకౌంట్స్‌కి రీఫండ్‌ అయ్యేలా చేశాం. మాకు ప్రేక్షకుల సౌకర్యాలే ముఖ్యం. కొన్ని థియేటర్స్‌ క్యాంటిన్‌ రేట్లు కూడా చాలా ఎక్కువ ఉన్నాయి. వాటిని కూడా సవరించే దిశగా ప్రయత్నాలు మొదలుపెట్టాం. చిన్న సినిమాలు మినిమం రేట్లకు, మీడియం సినిమాలు మొదటి వారం రోజులు మ్యాగ్జిమం రేట్లకు అమ్మాలి. తర్వాత మినిమం రేటుకు అమ్మాలి. పెద్ద సినిమాలు మొదటి రెండు వారాలు మ్యాగ్జిమం. తర్వాత మినిమం రేట్లకు అమ్మాలి. ఈ రేట్లు అన్ని పన్నులతో సహా ఉంటాయి' అని చెప్పారు.
