రాజశేఖర్‌ కథానాయకుడిగా నటించిన తాజా సినిమా 'శేఖర్‌'. ఇందులో ఆయన పెద్ద కుమార్తె శివాని రాజశేఖర్‌ కీలక పాత్రలో కనిపించనున్నారు. సినిమాలోనూ రాజశేఖర్‌ కుమార్తె పాత్రలో శివాని నటించడం ఓ విశేషమైతే, వెండితెరపై తండ్రీతనయలు కలిసి కనిపించనున్న తొలి చిత్రమిదే కావడం మరో విశేషం. సోమవారం చిత్ర బృందం రాజశేఖర్‌, శివానీ రాజశేఖర్‌ స్టిల్స్‌ని రిలీజ్‌ చేసింది.
హీరోగా రాజశేఖర్‌ 91వ సినిమా ఇది. జీవితా రాజశేఖర్‌ దర్శకత్వం వహించారు. స్క్రీన్‌ ప్లే కూడా ఆమె సమకూర్చారు. వంకాయలపాటి మురళీకష్ణ సమర్పణలో, పెగాసస్‌ సినీ కార్ప్‌, టారస్‌ సినీ కార్ప్‌, సుధాకర్‌ ఇంపెక్స్‌ ఐపీఎల్‌, త్రిపురా క్రియేషన్స్‌ పతాకాలపై బీరం సుధాకర్‌ రెడ్డి, శివాని రాజశేఖర్‌, శివాత్మికా రాజశేఖర్‌, వెంకట శ్రీనివాస్‌ బొగ్గరం ఈ చిత్రాన్ని నిర్మిస్తున్నారు.
ఈ చిత్రం గురించి దర్శకురాలు జీవితా రాజశేఖర్‌ మాట్లాడుతూ, 'రాజశేఖర్‌, శివాని మధ్య సన్నివేశాలు సినిమాకి ప్రత్యేక ఆకర్షణగా నిలుస్తాయి. నిజ జీవితంలో ఎలా ఉంటారో, సినిమాలో కూడా అలాగే ఉన్నారు. చాలా సహజంగా నటించారు. ఇప్పటికే విడుదల చేసిన ప్రచార చిత్రాలు, ఫస్ట్‌ గ్లింప్స్‌, 'లవ్‌ గంట మోగిందంటే..' పాటకు అద్భుత స్పందన లభించింది. సినిమా కూడా అదే స్థాయిలో ఆకట్టుకుంటుందనే నమ్మకం ఉంది. ప్రస్తుతం పోస్ట్‌ ప్రొడక్షన్‌ పనులు జరుగుతున్నాయి. త్వరలోనే సినిమా విడుదల తేదీని ప్రకటిస్తాం' అని చెప్పారు.
రాజశేఖర్‌, శివాని రాజశేఖర్‌, ఆత్మీయ రజన్‌, జార్జ్‌ రెడ్డి ఫేమ్‌ ముస్కాన్‌, అభినవ్‌ గోమఠం, కన్నడ కిషోర్‌, సమీర్‌, భరణి శంకర్‌, రవి వర్మ, శ్రవణ్‌ రాఘవేంద్ర తదితరులు నటించారు.
