రామ్‌ పోతినేని కథానాయకుడిగా తమిళ అగ్ర దర్శకుడు లింగుస్వామి దర్శకత్వంలో తెరకెక్కుతున్న ఊర మాస్‌ యాక్షన్‌ ఎంటర్టైనర్‌కి 'ది వారియర్‌' అనే టైటిల్‌ ఖరారు చేశారు. రామ్‌ 19వ చిత్రమిది. సోమవారం టైటిల్‌ రివీల్‌ చేయడంతో పాటు రామ్‌ ఫస్ట్‌ లుక్‌ని విడుదల చేశారు. శ్రీనివాసా సిల్వర్‌ స్క్రీన్‌ పతాకంపై ప్రొడక్షన్‌ నెం. 6గా శ్రీనివాసా చిట్టూరి ఈ చిత్రాన్ని తెలుగు, తమిళ భాషల్లో నిర్మిస్తున్నారు.
ఈ సందర్భంగా నిర్మాత శ్రీనివాసా చిట్టూరి మాట్లాడుతూ, 'రామ్‌ లుక్‌, టైటిల్‌ పోస్టర్‌కు అద్భుత స్పందన లభిస్తోంది. అందరిలో అంచనాలు పెరిగాయి. వాటికి మించి సినిమా ఉంటుంది. ప్రేక్షకులకు నచ్చేలా కథ - కథనం పరుగులు పెట్టిస్తూ, సినిమాలు తీయడం లింగుస్వామి స్టైల్‌. 'ది వారియర్‌'ను అలాగే తీస్తున్నారు. 'రన్‌', 'పందెం కోడి', 'ఆవారా' చిత్రాలను మించిన స్థాయిలో ఈ చిత్రాన్ని లింగస్వామి తీర్చిదిద్దుతున్నారు. ఈ నెలలో కొత్త షెడ్యూల్‌ స్టార్ట్‌ చేశాం. ప్రస్తుతం కీలక సన్నివేశాలు తెరకెక్కిస్తున్నాం. దేవిశ్రీ ప్రసాద్‌ సంగీతం అందిస్తున్నారు. టాప్‌ టెక్నీషియన్లు, భారీ బడ్జెట్‌, హై టెక్నికల్‌ వ్యాల్యూస్‌తో తెలుగు, తమిళ భాషల్లో ఎంతో ప్రతిష్టాత్మకంగా దీన్ని రూపొందిస్తున్నాం' అని అన్నారు. కతి శెట్టి కథానాయికగా నటిస్తుండగా, ఆది పినిశెట్టి ప్రతినాయకుడిగా, అక్షరా గౌడ కీలక పాత్రలో మెరవబోతున్నారు. ఈ చిత్రానికి కూర్పు: నవీన్‌ నూలి, ఛాయాగ్రహణం: సుజీత్‌ వాసుదేవ్‌, మాటలు: సాయిమాధవ్‌ బుర్రా - లింగుస్వామి, సంగీతం: దేవిశ్రీ ప్రసాద్‌.
