అవికా గోర్‌, శ్రీరామ్‌ ప్రధాన పాత్రల్లో ఎస్‌ఆర్‌ మూవీ మేకర్స్‌, అన్విత అవని క్రియేషన్‌ పతాకాలపై రూపొందిన సినిమా 'టెన్త్‌ క్లాస్‌ డైరీస్‌'. అచ్యుత రామారావు.పి, రవితేజ మన్యం సంయుక్తంగా నిర్మించారు.
అజరు మైసూర్‌ సమర్పకులు. ఈ సినిమాతో సినిమాటోగ్రాఫర్‌ 'గరుడవేగ' అంజి దర్శకుడిగా పరిచయం అవుతున్నారు. ప్రసాద్‌ ల్యాబ్స్‌లో బుధవారం జరిగిన కార్యక్రమంలో ఈ సినిమా టీజర్‌ను నిర్మాత సి.కల్యాణ్‌, సినిమాటోగ్రాఫర్‌ ఛోటా కె. నాయుడు విడుదల చేశారు. న్యూ ఏజ్‌ ఫిల్మ్ మేకర్‌ ప్రవీణ్‌ సత్తారు, సినిమాటోగ్రాఫర్‌ రత్నవేలు, సంగీత దర్శకుడు 'హిప్‌ హాప్‌' తమిళ, హీరో ఆర్య ట్విట్టర్‌ ద్వారా టీజర్‌ని రిలీజ్‌ చేశారు. రిలీజ్‌ డేట్‌ పోస్టర్‌ను నిర్మాత టి.రామసత్యనారాయణ, రచయిత బీవీఎస్‌ రవి ఆవిష్కరించారు. మార్చి 4న ఈ సినిమా ప్రేక్షకుల ముందుకు రానుంది. ఈ సందర్భంగా నిర్మాత అచ్యుత రామారావు మాట్లాడుతూ, 'మా టెన్త్‌ క్లాస్‌మేట్స్‌ అందరూ రీయూనియన్‌ అయిన తర్వాత అందులో నుంచి వచ్చిన పాయింట్స్‌ తీసుకుని సినిమా చేశాం. తప్పకుండా హిట్‌ కొడుతున్నామనే నమ్మకం ఉంది' అని చెప్పారు.
'సుజీత్‌ మంచి స్క్రీన్‌ ప్లే, డైలాగ్స్‌ రాశారు. సురేష్‌ బొబ్బిలి, చిన్నా, ప్రవీణ్‌ పూడి బాగా సపోర్ట్‌ చేశారు. ఈ సినిమాకు అవికా గోర్‌ పెద్ద ప్లస్ పాయింట్‌. క్లైమాక్స్‌లో తన పెర్ఫార్మన్స్‌ చూసి ప్రేక్షకులు కన్నీళ్లు పెట్టుకుంటారు. '96', 'నా ఆటోగ్రాఫ్‌ స్వీట్‌ మెమరీస్‌', 'కొత్త బంగారు లోకం' కోవలో ఈ సినిమా ఉంటుంది' అని దర్శకుడు 'గరుడవేగ' అంజి అన్నారు.
నాయిక అవికా గోర్‌ మాట్లాడుతూ, 'పదో తరగతిలో ఉన్నప్పుడు 'ఉయ్యాలా జంపాలా' చేశా. ఆ సినిమాతో తెలుగు ప్రేక్షకులు నన్ను యాక్సెప్ట్‌ చేశారు. చాలా ఇంట్రెస్టింగ్‌ క్యారెక్టర్‌ చేస్తున్న ఈ సినిమా నాకెంతో ప్రత్యేకం' అని తెలిపారు.
